Baş nazirə seçkilər öncəsi Azərbaycanla sülh müqaviləsini bağlamaq da hava və su kimi lazımdır
Ermənistan parlamentinin sədri Alen Simonyan Ermənistanın Baş naziri Nikol Paşinyanın Türkiyəyə səfər edəcəyini təsdiqləyib. Alen Simonyan Paşinyanın Türkiyə Prezidenti Rəcəb Tayyib Ərdoğanın dəvəti ilə Ankaraya səfər edəcəyini açıqlayıb. Erməni spiker qeyd edib ki, Paşinyan və Ərdoğan iyunun 20-də Ankarada görüşəcəklər.
Politoloq Məhəmməd Əsədullazadə "Sherg.az"a deyib ki, Nikol Paşinyan türkiyəli həmkarı R.T.Ərdoğandan sərhədlərin açılmasını istəyəcək. Ekspert vurğulayıb ki, Ermənistan Baş naziri Nikol Paşinyan seçkilər öncəsi Rusiyanın artan siyasi təzyiqlərindən qorunmaq və Azərbaycanla seçkilərə kimi sülh müqaviləsi bağlamaq ümidi ilə Türkiyəyə səfər edir:
"Ermənistanda müxalifət və kilsə Paşinyana qarşı ciddi hazırlıq içindədir. Hər keçən gün tərəflər arasında siyasi münasibətlər daha kəskin mərhələyə keçir. ABŞ Prezidenti D.Tramp C.Baydendən fərqli olaraq N.Paşinyana dəstək vermir. Avropa İttifaqı Rusiya-Ukrayna müharibəsinə daha çox kilidlənib. Paşinyan seçkiqabağı Ərdoğandan ciddi dəstək almağa gedir".
Analitik qeyd edib ki, Paşinyana seçkilər öncəsi Azərbaycanla sülh müqaviləsi bağlamaq hava və su kimi lazımdır:
"Bu, çətin olacaqsa, Paşinyan heç olmasa, Türkiyə ilə sərhədlərin açılmasını istəyəcək. Maraqlı proseslər gedir. Paşinyanın Ermənistan daxilində, seçkilər ərəfəsində reytinqini artırmaq üçün Türkiyə ilə sərhədlərin açılmasına gedilə bilər. Ermənistanda Paşinyandan fərqli digər siyasilər Azərbaycan və Türkiyə qarşı düşmən münasibət sərgiləyir. Paşinyan Ərdoğandan sərhədlərin açılmasını xahiş edəcək. Ankara Bakı ilə məsləhətləşmələrdən sonra qərar verə bilər".
