“Yalan məlumat insanların şüuruna təsir edərək təşviş yaradır”
“Təşvişə düşmüş adam isə düzgün düşünmür, soyuqqanlı addım atmır”
Tovuzdakı təxtibat təkcə sərhəddəki atışma ilə məhdudlaşmır. Həm də informasiya mühitində ciddi müharibənin getməsi heç kimə sirr deyil. Məhz ötürülən məlumatlar ictimai şüuru formalaşdıraraq insanların, siravi vətəndaşların davranışlarına təsir göstərir. Deməli, jurnalistlər informasiya təminatı məsələsinə xüsusi diqqətlə yanaşmalı, yalanların “ayaq açıb yeriməsinə” icazə verməməlidirlər.
“Modern.az” saytının baş redaktoru Elşad Eyvazlı “Sherg.az”a açıqlamasında bildirib ki, indiki məqamda hər kəsdən ilk növbədə vətəndaşlıq tələb olunur:
“Çox həssas zamandır. Ermənilər hər tərəfdən təxribat törədirlər, mənfurluqlarına sadiq qalırlar. Odur ki, indi nə jurnalist olmalıyıq, nə həkim...İndi vətəndaş olmaq lazımdır. Ancaq rəsmi informasiyaları tirajlamaq şərtdir. Bu, həm də müharibənin qanunudur”.
E.Eyvazlının sözlərinə görə, mətbuatın işi çox çətindir. Peşəkar media indi həm də sosial şəbəkələrlə mübarizə aparmalıdır:
“Bilmək lazımdır ki, informasiyanı kim tez verirsə, o da qalib olur. Yalan məlumat insanların şüuruna təsir edərək təşviş yaradır. Təşvişə düşmüş adam isə düzgün düşünmür, soyuqqanlı addım atmır.
Ona görə də məlumatı peşəkar media birinci ötürməlidir. Bunun üçün dövlət qurumları ilə əməkdaşlıq etmək şərtdir. Dövlət qurumları da öz növbələrində çevik davranmalı, informasiyanı mümkün qədər operativ ötürməlidirlər.
İkinci bir məqam isə müxtəlif KİV orqanlarının koordinasiyalı fəaliyyət göstərməsidir. Əgər bu iki amil olsa, peşəkar media dezinformasiyaların yayılmasına imkan verməz”.
Baş redaktor dezinformasiyaların nələrlə nəticələnə biləcəyini faktlarla göstərdi:
“Tovuzda başlayan hadisələr Milli Məclisin qarşısındakı təxrtibatla davam etdi. Azərbaycan xalqının yürüşünü çox yüksək qiymətləndirirəm. Bu, millətimizin qürurundan, vətəndaşlıq mövqeyindən xəbər verir. Amma parlamentə girmək səhv addım idi. Qanunverici qurum nə etsin ki? Bilirsiz niyə belə oldu?
Çünki insanlara istiqamət verilmədi. Bundan sui-istifadə edən təxribatçılar da öz işlərini gördülər. Əslində insanların qarşısına bir ziyalı çıxmalı, onları düzgün yolla aparmalı idi”.
