Bu ilin yanvar-oktyabr aylarında Azərbaycan 2,7 milyard ABŞ dolları dəyərində qeyri-neft məhsulları ixrac edib.
Bu barədə İqtisadi İslahatların Təhlili və Kommunikasiya Mərkəzi məlumat yayıb.
Məlumata görə, bu, ötən ilin eyni dövrü ilə müqayisədə 11,1 % çoxdur.
Xatırladaq ki, 2022-ci ildə Azərbaycanın qeyri-neft ixracı 2021-ci illə müqayisədə 12,3 % artaraq 3,05 milyard ABŞ dolları təşkil edib.
İqtisadçı-ekspert Eldəniz Əmirov "Sherg.az"a bildirib ki, Azərbaycanın qeyri-neft məhsullarının ixracı üzrə müşahidə olunan bu artım müsbət qiymətləndirilməlidir:
" Ötən il və bu ilin ilk 10 ayı ərzində olan rəqəmlər kifayət qədər yüksək artım dinamikası olduğunu göstərir. 2023-cü il artım qrafikinə diqqət yetirsək, 11 faizlik artımın olduğu nəzərə çarpır. Dəyər baxımından artım aylıq orta göstərici olaraq 270 milyon dollardır. Əgər qarşıdakı 2 ay ərzində də, qeyri-neft məhsulları üzrə ixrac stabilliyini qoruyarsa, əlavə 540 milyon dollar vəsait əldə olunacaq. Bu da ilin sonuna Azərbaycanın qeyri-neft ixaracından 3,24 milyard dollar gəlir əldə etməsi deməkdir. Ümumilikdə əldə olunan məbləğ baxımından 2023-cü ilin öncəki ili üstələməsinin şahidi olacağıq".
