Qardaş Türkiyədə səfərdə olan Yeni Azərbaycan Partiyasının (YAP) nümayəndə heyəti ilə İstanbulda Üsküdar bələdiyyəsinin başqanı Hilmi Türkmən arasında görüş keçirilib.
Bu barədə "Report"un Türkiyəyə ezam olunmuş əməkdaşı xəbər verir.
Görüşdə Milli Məclisin deputatları Nizami Səfərov, Aydın Mirzəzadə, Kəmaləddin Qafarov, Ceyhun Məmmədov, YAP Sumqayıt şəhər təşkilatının sədri Ramiz Hüseynov iştirak ediblər.
Görüş zamanı Azərbaycan-Türkiyə, eləcə də hər iki ölkənin xalqları arasında dostluq və qardaşlıq münasibətlərindən söz açılıb.
Çıxış edən H.Türkmən bildirib ki, Türkiyə ilə Azərbaycan arasında münasibətlər yüksələn xətlə inkişaf edir.
O söyləyib ki, həm Azərbaycan, həm də Türkiyə pis günlərində də, yaxşı günlərində də hər zaman bir-birinin yanında olublar.
Qeyd edilib ki, məhz bu münasibətlər sırf dostluq və qardaşlıq əlaqələrindən irəli gələn məsələlərdəndir.
Görüş zamanı həm Türkiyənin, həm də Azərbaycanın inkişaf yolundan, həmçinin son illər əldə olunan nailiyyətlərdən söz açılıb.
Eyni zamanda Azərbaycanın Vətən müharibəsində göstərdiyi möhtəşəm qələbəsindən danışılıb və uzun illər işğal altında olan torpaqların azad olunmasının əhəmiyyətindən bəhs edilib.
Qeyd edilib ki, bütün bunlara həm döyüş meydanında, həm də siyasət masasında nail olunub.
Həmçinin İkinci Qarabağ müharibəsində Türkiyənin Azərbaycana göstərdiyi mənəvi dəstəyindən söz açılıb.
Görüş zamanı üzərində Azərbaycanın işğaldan azad olunmuş rayon və şəhərlərinin adları əks edilmiş hədiyyə H.Türkmənə təqdim edilib.
Eyni zamanda H.Türkmən də Azərbaycan nümayəndə heyətinə hədiyyə təqdim edib.
Sonda xatirə fotosu çəkilib.
