Türkiyə Suriyada iki hərbi baza tikə, orada F-16 qırıcıları yerləşdirə bilər.
Axar.az xəbər verir ki, bu barədə “Türkiyə” qəzeti ərəb mənbələrinə istinadla məlumat yayıb.
“Ərəb mənbələri iddia edir ki, Türkiyə və Suriya ortaq müdafiə sazişi imzalayacaq. Yaxın vaxtlarda imzalanması gözlənilən sazişə əsasən, Dəməşq qəfil təhlükə ilə üzləşəcəyi təqdirdə Ankara Suriyaya yardım edəcək. Razılaşmada həmçinin Türkiyə Silahlı Qüvvələrinin Suriya ordusuna və onun pilotlarına təlim keçməsi, Türkiyənin Suriyada iki hərbi baza qurması da nəzərdə tutulur. Türkiyə ölkənin suverenliyinə qarşı yönələ biləcək hər hansı hücumun qarşısını almaq üçün bu bazalarda 50 ədəd F-16 döyüş təyyarəsi yerləşdirəcək”, - məlumatda qeyd olunub.
Nəşr bildirib ki, Suriyanın yeni administrasiyası İsraillə sərhədə nəzarət etmək üçün Türkiyədən PUA, radarlar və radioelektron mübarizə vasitələri istəyib.
Qəzetin Suriya Müdafiə Nazirliyindəki mənbəyə istinadla verdiyi məlumata görə, PUA-ların ilkin tədarükü yaxın günlərdə baş tutacaq.
