İki ildir evdən bayıra çıxa bilmir...
Gənclərin əyləncələri bəzən faciələr, dəhşətlərlə müşayiət olunur və gələcək həyatlarını qaraldır. BBC (Türkcə) bir neçə gəncin başına gələn bədbəxt olaylara işıq tutub. “Şərq” “Milliyet.com”a istinadən bildirir ki, 21 yaşlı Mia Doshi Prichard 2020-ci ilin 17 yanvar tarixində tələbə dostlarıyla əylənməyə çıxıb. O gündən sonra 2 ildir ki, evdən bayıra çıxmağa qorxur, gənc qızda evdən çıxmaq qorxusu – küçə fobiyası yaranıb.
Halbuki həmin gün əylənməyə gedərkən bir az içki içmək, rəqs etmək və sonra da evə dönməyi planlaşdırıb. “BBC Radio 1”də “Newsbeat” proqramına qonaq olan Mia “içki badəmi masanın üzərinə qoydum, dostlarımla rəqs etmək üçün arxaya döndüm. Niyə bunu etdim, deyə, hələ də özümün danlayıram, özümü bağışlaya bilmirəm. Nə oldusa, həmin dəqiqədə oldu. Badəmin içinə dərman atdıqlarına əminəm.
Çünki bir neçə millət vəkilinin də tərkibində olduğu komissiya içkiyə dərman qatıldığı mülahizəsi üzərində dayanıb. Onların rəyi də bəzi dərmanların insanlarda uzunmüddətli təsir buraxdığını təsdiqləyir. Mən də dostlarımla birlikdə, onlar nə qədər içki qəbul etdisə, o qədər içmişdim. Amma nəzarətimi itirdim, harada olduğumu anlamaqda çətinlik çəkirdim.
O gecədən sonra psixoloji gərginlik içindəyəm, nə vaxt evdən çıxmaq istəsəm qorxu hissi üstün gəlir və evdən çıxa bilmirəm”, söyləyib. 30 yaşlı Saskia Boissevain də eyni vəziyyətlə üzləşib. 2021-ci ilin sentyabrında bir əyləncə mərkəzində içkisinə yad maddə qatılıb. Bundan sonra Saskia şüurunu itirib. Saskia ancaq bara getdiyini və içki qəbul etdiyini xatırlayır, başqa heç nə. Niamh Donnelli də bu dəhşəti yaşayıb.
Dostlarıyla başqa bir dostunun evindəki görüşdən sonra nələr baş verdiyini xatırlamır. Onun evə dönməsinə küçədəki insanlar yardım edib:
”Bu çox utancverici idi. Bundan sonra daha diqqətli olacağıma, tanımadığım insanların əlindən içki almayacağıma dair özümə söz verdim”. 21 yaşlı Niamh da evdən çıxmağa qorxduğunu, xüsusilə əcnəbilərdən ehtiyatlandığını deyib. Odur ki, əyləncələrə çox həvəs göstərmək ziyanlıdır. İçkilərə qatılan maddələr insanların beyninə təsir edir, yaddaş itkisiylə yanaşı, güvənsizlik, qorxu kimi psixoloji problemlər yaradır.
