Məlum olduğu kimi, fəsillə əlaqədar olaraq evlərdə müxtəlif texniki avadanlıqlardan, o cümlədən kondisionerden daha çox istifadə olunur. Bu isə elektrik naqillərinə güc düşməsi deməkdir. Naqillər qızır və bədbəxt hadisə baş verir. Təsadüfi deyil ki, yanğınlar adətən məhz yay fəslində olur. Elə isə oxşar faciələrdən necə qorunmalı?
Təhlükəsizlik məsələləri üzrə ekspert Elmar Nurəliyev bu barədə “Sherg.az”a danışdı:
“Sakinlər fərdi yaşayış evlərində, həyət evlərində və binalarda təhlükəsizlik qaydalarına əməl etməlidirlər. İnsanların əksəriyyətinin “ikinci əl” mənzillərdə yaşadıqlarını nəzərə alsaq, onların daha diqqətli olmalarını deməliyik. Çünki mənzilin hansı keyfiyyətdə təmir edildiyini bilmirik. Təmir vaxtı keyfiyyətsiz mal-materiallardan, xüsusilə naqillərdən istifadə edilməməlidir”.
E.Nurəliyev bildirdi ki, bəzi məqamları nəzərə alsaq, yanğın təhlükəsini ehtimalını minimuma endirə bilərik:
“Elektrik qısaqapanmasından baş verən yanğın hadisələri daha çoxdur. Çünki bir çox hallarda televizor, kondisioner, paltaryuyan, kompüter...eyni anda işləyir. Beləliklə, elektrik xətləri yüklənir. Sonra isə xətlər qızır, qısaqapanma yaranır. Ona görə də elektriklə çalışan avadanlıqları növbəli işlətmək məqsədəuyğundur. Həmçinin elektrik birləşmə yerlərində qoruyucu qapaqlardan istifadə etməklə uşaqların təhlükəsizliyini təmin etmək mümkündür”.
