Son illər Azərbaycan dövlət bir sıra beynəxalq siyasi-iqtisadi və mədəniyyət tədbirlərinə, həmçinin beynəlxalq idman yarışlarına ev sahibliyi etməklə, dünyanın ən təhlükəsiz və regionda bu cür tədbirləri yüksək standartlarla təşkil etməyi bacardığını təsdiqlədi. Bu həm də ölkəmizin artan imicinə böyük təsir göstərdi.
Prezident İlham Əliyev 2003-cü ildə prezident seçildiyi gündən idman siyasəti prioritet təşkil etməyə başladı. Bu həm də Ulu Öndər Heydər Əliyevin idman siyasətinin davamı idi. Ölkədə idman komplekslərinin tikilməsi ölkədə idman hərəkatının kütləviləşdirilməsinə böyük səbəb oldu. Təkcə, paytaxtda yox, regionlarda da idman hərəkatı genişlənməyə başladı. Gənc və perspektivli idmançılar yetişdi. Onlar ölkəmizin bayrağını beynəlxalq yarışlarda zirvələrə qaldırdırlar. Bu həm də ölkəmizin tanıdılmasından baxımından uğurlu siyasət idi.
"Sherg.az" xəbər verir ki, belə idmançılardan biri də dünya çempionu Xəyal Quliyevdir.
İdman ictimaiyyəti Xəyal Quliyevi yaxşı tanıyır. Düzdür, Xəyal Quliyev özünü reklam etməyə üstünlük verməsə də, onun idman yolu zəngindir və qürurvericidir. Azərbaycan oxucusu Xəyal Quliyevi yaxından tanımalıdır. Xəyal Quliyev hər şeydən öncə təvazökar insandır. Heç bir zaman özü haqqında danışmağı sevmir. Onun hədəfi Azərbaycanı təmsil etmək və bayrağı ucalara qaldırmaqdır.
Söhbətimizdə ölkəmizi təmsil etməkdən qürur duyduğunu bildirdi.
Bəs, Xəyal Quliyev Azərbaycan oxucusu üçün kimdir?
Xəyal Quliyev 1 fevral 1991-ci ildə Azərbaycan Respublikasının Bərdə şəhərində anadan olub. Orta məktəb təhsilinə 1998-ci ildə Bərdə şəhərində başlayıb. Daha sonra ailəsi ilə birlikdə Azərbaycan Respublikasının Sumqayıt şəhərinə köçüb. Orta təhsilini Sumqayıt şəhəri 16 saylı orta məktəbdə davam etdirib. 2008-ci ildə orta məktəbi bitirdikdən sonra Sumqayıt texniki kollecinə qəbul olmuşdur. 2011-ci ildə oranı bitirdikdən sonra Avropa çempionatında qazandığı yüksək nailiyyətə görə Azərbaycan Respublikasının prezidentinin sərəncamı ilə Azərbaycan Dövlət Bədən Tərbiyəsi və İdman Akademiyasına qəbul olub. 2015-ci ildə Azərbaycan Dövlət Bədən Tərbiyəsi və İdman Akademiyasını bitirib.
Xəyal Quliyev idman karyerasına 1998-ci ildə idmanın sərbəst güləş növü üzrə başladığını bildirdi.
“2004-cü ildən etibarən idmanın kikboksinq növü ilə də məşğul oldum. Daha sonra 2007–2010-cu illərdə idmanın boks növündə də uğurlu çıxışlar etdim. İlk peşəkar uğurumu 2011-ci ildə qazandım. 2011-ci ilin fevral ayında Estoniyanın Tallin şəhərində keçirilən Avropa çempionatında gümüş medal qazandım. Həmin ilin noyabr ayında Türkiyənin İstanbul şəhərində keçirilən dünya çempionatında daha böyük uğura imza ataraq qızıl medala layiq görüldüm. 2012-ci il məhsuldar oldu. Belə ki, həmin ilin aprel ayında Rusiya Federasiyasının Sankt-Peterburq şəhərində keçirilən Avropa çempionatında birinci yeri tutdum. İranın Kiş şəhərində keçirilən dünya çempionatında da qızıl medal qazandım.
Daha sonra 2013-cü ildə Moldovanın Kişinöv şəhərində keçirilmiş Avropa çempionatında birinci yeri əldə etdim. 2013-cü ilin iyun ayında Ukraynanın Feodosiya şəhərində keçirilən dünya çempionatında da yüksək uğura imza ataraq qızıl medala layiq görüldüm”.
Onun uğurları ard-arda olub.
2013-cü ilin sentyabr ayında Tailandda keçirilən Dünya S–1 və döyüş növləri çempionatında da qızıl medal qazanmışdır. 2015-ci ildə Türkiyənin Antalya şəhərində keçirilən dünya çempionatında bütün rəqiblərinə qalib gələrək daha bir dəfə dünya çempionu olub. 2016-cı ildə ikinci dəfə iştirak etdiyi və ABŞ-də keçirilən dünya döyüş növləri çempionatında bürünc medala layiq görülüb.
2018-ci ildə Moldovanın Kişinyov şəhərində keçirilən Avropa çempionatında da qızıl medala layiq görülmüşdür.
2021-ci ildə Tunisin Hammaret şəhərində keçirilən dünya çempionatında iştirak edən və gümüş medal qazanan Xəyal Quliyev bu gün Azərbaycanın qarışıq döyüş və BUDO idman növündə ən titullu idmançılarından biri hesab olunur.
İdmançımız ictimai və məşqçilik fəaliyyətini paralel şəkildə aparır.
“İdmançı karyerasını davam etdirməklə yanaşı, məşqçilik fəaliyyəti ilə də məşğul oluram. Dünya və Avropa çempionu olan çoxsaylı tələbələr yetişdirmişəm. 2011-ci ildən Azərbaycan BUDO və Qarışıq Döyüş Növləri Federasiyasının Sumqayıt nümayəndəliyinin rəhbəri, 2020-ci ildən etibarən, həmçinin, FULL kontakt və MMA versiyası üzrə Azərbaycan yığma komandasının baş məşqçisiyəm. 2020-ci ildən Azərbaycan S-1 peşəkar döyüş növləri federasiyasının vitse–prezidenti, 2021-ci ildən isə bu federasiyanın birinci vitse–prezidenti vəzifəsini həyata keçirirəm.
Cənab Prezidentimiz başda olmaqla, dövlətimizin idman siyasətinə dəstək verən və prezidentimizin idman siyasətini uğurlu həyata keçirən dövlət rəsmilərimizə öz təşəkkürümü bildirirəm. İdman sahəsində əldə etdiyim uğurlar diqqətdən kənarda qalmadı. Əməyim qiymətləndirildi.
2012-ci ildə Azərbaycan Respublikasının “İdman ustası” , 2018-ci ildə Azərbaycan Respublikası "əməkdar idman ustası" fəxri adına layiq görülməyim dövlətimizin xidmətlərimə verdiyi ən qiymət hesab edirəm. Bundan sonra ölkəmizin adını və müqəddəs üçrəngli bayrağımızı zirvələrə qaldırmağa çalışacam”.
