Həyatımızdakı bəzi insanlar sadəcə epizodik xarakter daşıyır. Gəlir və gedirlər. Bəziləri isə nəinki bu günümüzə, həm də gələcəyimizə toxunurlar.
Mənim üçün belə adamlardan biri çoxdan- uşaqlıqdan tanıdığım məşqçim, müəllimim Vüsal Əhmədovdur. 13 nömrəli İxtisaslaşmış Olimpiya Uşaq və Gənclər İdman Məktəbində uzun müddət onun rəhbərliyi ilə cüdo idman növü ilə məşğul olmuşam. Arada fasilələr vermişəm. Amma hər dəfə geri qayıdanda məni yeni səmimiyyət, diqqətlə qarşılayıb.
Əgər bunun bir səbəbi Vüsal müəllimin atam və rəhmətlik əmimlə olan dostluğu idisə, ikincisi, heç şübhəsiz, onun özünün xarakteri ilə bağlıdır.
Belə ki, Vüsal müəllim təkcə idmançı və ya idman mütəxəssisi deyil, əsl müəllimdir. İnsan psixologiyasını, kimə necə yanaşmaq lazım olduğunu bilir. Sərtliyi də var, səmimiyyəti də. Amma ədalətsizliyi yoxdur.
Yadıma gəlir, ilk vaxtlar güləşəndə hər dəfə kimanonun kəməri açılanda bağlaması üçün onun yanına qaçırdım. Təbəssüm edir, dizi üstə oturub bağlayırdı. Həmin bir neçə saniyə ərzində həm də nə isə tövsiyə verirdi. Məsələn deyirdi ki, tapşırıqları yeri yetirməyə tənbəllik etmə, çünki hər şey ən elementar hərəkətdən- bəzən ayağını bir addım qabağa qoymaqdan başlayır.
Ümumiyyətlə, o, belə psixoloji söhbətləri çox sevirdi. Hərdən məşqin sonuna bir az qalmış, ya da elə məşqin ortasında bütün idmançılara sıraya düzülmək barədə tapşırıq verir və danışırdı: "Yarışda udmaq üçün məşqdə yorulmaq lazımdır. Çox əziyyət çəkmək, müəllimin dediklərini dəqiq yerinə yetirmək lazımdır...".
Əslində Vüsal müəllim bizi həm də gələcək həyata hazırlayırdı. Ağır fiziki məşqdən, yaxud qaçışdan sonra yaxınlaşıb yorulduğumu deyirdim. Əvvəl üzümə baxır, sanki, həqiqətən, yorulub- yorulmadığımı müəyyənləşdirirdi. Sonra da "ya artıq bəsdir" deyir, ya da sonuncu cəhdi də etmək lazım olduğunu deyirdi. Yəni Vüsal Əhmədov həm də yetirmələrinə özünəinamı öyrədir.
Bəlkə də, yaxşı idmançı ola bilməmişəm. Amma Vüsal müəllimdən çox şey öyrənmişəm. Vaxt ötdükcə bunu daha çox hiss edirəm.
İndi mən də müəlliməm. Öz tələbələrimlə münasibətdə Vüsal Əhmədovdan öyrəndiklərimi tətbiq etməyə çalışıram. Bu mənada əslində mən onun yetişdirdiyi yüzlərlə çempion kimi Vüsal müəllimə minnətdaram.
Ad gününüz, yeni yaşınız mübarək, müəllim. Cüdo dili ilə desək, "ippon"larınız bol olsun.
Kənan Novruzov
