Bakıda keçirilən minifutbol üzrə dünya çempionatının qalibi bəlli olub.
Milli Gimnastika Arenasında təşkil olunan final görüşündə Azərbaycan və Macarıstan yığmaları üz-üzə gəliblər. Matç komandamızın 4:2 hesablı qələbəsi ilə yekunlaşıb.
Millimizin heyətində qolları Təmkin Xəlilzadə, Məhəmməd Xəlilov və Rəvan Kərimov (2) vurublar.
Bununla da, Elşad Quliyevin rəhbərlik etdiyi kollektiv tarixində ilk dəfə dünya çempionatının qalibi olub.
Qeyd edək ki, turnirdə üçüncü yeri Monteneqroya 3:0 hesabı ilə qalib gələn Serbiya millisi tutub.
Oyunu dəyərləndirən İctimai Televiziyanın İdman departamentinin rəhbəri Kənan Hakimov “Sherg.az”a söyləyib ki, minifutbol üzrə milli komandamızın Bakıda keçirilən dünya çempionatında qalib gəlməsi böyük uğurdur:
“Bu qələbə uzun illər aparılan zəhmətin bəhrəsidir. Millimiz daha öncə 2022-ci ildə Avropa çempionu olmuşdu. Komandamızın heyətində çıxış edən futbolçuların hamısının yerli olması bu qələbənin önəmini daha da artırır. Bu o deməkdir ki, bizim legionersiz və milliləşdirilmə olmadan da böyük qələbələr qazana biləcək potensialımız var. Yetər ki, işlər düzgün qurulsun. Həm infrastruktur, həm minifutbolda yerli çempionatın təşkili, qalib klubların avrokuboklarda iştirakı bir sözlə bu istiqamətdə kütləviliyə yönəlik addımların məntiqi nəticəsi millimizin dünya çempionluğu oldu. Başqa sözlə bu günə kimi görülən işlər və seçilən strategiya məhz bu sahədə böyük uğurlarla hesablanmışdı. Bu qələbə əlbəttə ki, futbolun daha da kütləviləşməsinə təkan verəcək. Bu günlər ərzində Milli Gimnastika Arenasında yüzlərlə azarkeş millimizin oyununu tribunadan izləyirdi. Final matçına ümumiyyətlə bilet tapmaq mümkün deyildi. Bu məqamlar ölkəmizdə futbolun nə qədər sevildiyini göstərir”.
