İstanbulun Şişli rayonunun Elmadağ səmtində yerləşən Arif Paşa Apartmanı 120 ildən artıqdır şəhərin dəyişiminə şahidlik edir.
1894-cü ildə inşasına başlanılan və 1902-ci ildə tamamlanan bina Sultan II Əbdülhəmid dövrünün saray həkimlərindən Sarıcazadə Arif Paşa tərəfindən tikdirilib. Layihənin müəllifi isə rum əsilli Osmanlı memarı Konstantin P. Pappa olub.
U formasında inşa edilən yeddi mərtəbəli bina geniş daxili həyəti, böyük mənzilləri, hündür tavanları, mərmər pilləkənləri və asansörü ilə dövrünün diqqətçəkən yaşayış tikililərindən biri sayılıb.
Arif Paşa Apartmanı yalnız memarlığı ilə deyil, burada yaşamış tanınmış şəxslərlə də seçilir. Türk keramika sənətinin öncüllərindən Füreya Koral bir müddət burada yaşayıb və binanın bir hissəsindən emalatxana kimi istifadə edib. Yazıçı Pınar Kür də apartmanın sakinlərindən biri olub.
Bina Şakir Paşa Apartmanı ilə də yaxın tarixə malikdir. Eyni küçədə yerləşən Şakir Paşa Apartmanı 1973-cü ildə sökülərək yerində iş hanı inşa edilib. Arif Paşa Apartmanı isə günümüzə qədər qorunub saxlanılıb.
Bu gün Arif Paşa Apartmanı İstanbulun Osmanlı dövründən müasir şəhər həyatına keçidini əks etdirən tarixi memarlıq nümunələrindən biri olaraq qalır.
