Yaxın günlərdə Ukraynanın Moskvaya güclü zərbələr endirməsi ehtimalı yüksəlib
“Rusiya ilə ABŞ arasında dialoqda ciddi fasilə yaranıb”. Bu barədə Rusiya prezidentinin mətbuat katibi Dmitri Peskov jurnalistlərə bildirib.Kreml sözçüsü qeyd edib ki, dialoq prosesində, (Ukrayna ilə bağlı) İstanbul danışıqlarının inkişafında ciddi fasilə yaranıb. Peskovun sözlərinə görə, Ukrayna rəhbərliyi hələ də sənədlərlə bağlı heç bir cavab verməyib: “Heç nə irəli getmir”.
Ekspertlərə görə, bu diplomatik durğunluq regionda hərbi gərginliyin daha da artmasına səbəb ola bilər.
Milli Cəbhə Partiyası sədrinin müavini, politoloq Məhəmməd Əsədullazadə hesab edir ki, yaxın günlərdə Ukraynanın Rusiyanın paytaxtı Moskvaya qarşı güclü zərbələr endirməsi ehtimalı yüksəlib. O, Sherg.az-a açıqlamasında deyib ki, ABŞ və Rusiya arasında danışıqlar prosesi tükənib və Vaşinqton artıq Moskva üzərində hərbi təzyiq mərhələsinə keçid edir:
“Co Bayden Administrasiyasından fərqli olaraq Donald Trampın mövqeyi fərqli xarakter daşıyır. Əvvəlki administrasiya Rusiya ilə gərginliyin davam etməsində maraqlı görünürdü, Tramp isə konkret nəticəyə hesablanan taktika ilə prosesin uzanmamasına çalışırdı. Lakin indi D.Trampın mövqeyinin kardinal şəkildə dəyişməsində əsas səbəb isə V.Putinin geri addım atmamasıdır”.
Politoloqun fikrincə, müharibə artıq yeni mərhələyə daxil olur və Moskva yaxın zamanlarda bu reallığın fərqinə varacaq:
“Əgər Ukrayna Moskvadakı strateji obyektlərə zərbələr endirərsə, bu, Kremlin qapısının döyüldüyü anlamına gələcək. O zaman Rusiya rəhbərliyi başa düşəcək ki, müharibə artıq yalnız Ukrayna ərazisində deyil, birbaşa Rusiyanın daxilində hiss olunur”.
