CNN-in diplomatik mənbələrə istinadən yaydığı məlumata görə, ABŞ və İran arasında uzun müddətdir davam edən nüvə danışıqları razılaşma mərhələsinə çatıb. Bildirilir ki, tərəflər yaxın vaxtlarda keçiriləcək növbəti görüşdə hərtərəfli nüvə sazişini imzalaya bilərlər.
Qeyd olunur ki, danışıqların əsas məqsədi İranın uranı yüksək səviyyədə zənginləşdirməsini dayandırmaq və bölgədə nüvə silahı təhlükəsini minimuma endirməkdir. Vaşinqton İranın nüvə proqramının hərbi məqsədlər üçün istifadə olunmamasını təmin etməyə çalışır. İran isə proqramının yalnız mülki və enerji məqsədlərinə xidmət etdiyini bildirir.
Sonuncu görüş mayın 23-də Romada baş tutub və bu, iki ölkə nümayəndələrinin bu il ərzində apardığı beşinci birbaşa danışıqlar olub. Danışıqlarda vasitəçi rolunu Oman Krallığı oynayıb. Oman uzun illərdir İranla Qərb arasında körpü rolunu oynayan neytral vasitəçi kimi çıxış edir.
Politoloq Natiq Miri Sherg.az-a deyib ki, ABŞ və İran arasında aparılan danışıqların uzanmasının əsas səbəbi Vaşinqtonun qəti tələbləridir:
"ABŞ açıq şəkildə bildirir ki, İran nüvə silahı əldə edə bilməz. Bunun üçün isə nüvənin zənginləşdirilməsi prosesi dayandırılmalıdır. Lakin Tehran bu tələbi qəbul etmir. İran israrla nüvə proqramının yalnız mülki məqsədlərlə həyata keçirildiyini bildirir və zənginləşdirmədən imtina etməyə hazır olmadığını vurğulayır. Hazırda İranda zənginləşdirilmiş uranın səviyyəsi 80-90 faiz arasındadır. Vaşinqton isə bu materialların ölkədən çıxarılmasını və ya mülki məqsədlərlə istifadəsini, eyni zamanda gələcəkdə zənginləşdirmədən tamamilə imtina olunmasını təklif edir. Hazırda Tehran bu şərtlərlə razılaşmır.
Buna baxmayaraq, tərəflərin müəyyən şərtlərlə razılıq əldə etməsi mümkündür. Belə ki, ABŞ dondurulmuş vəsaitlərin İrana qaytarılmasını və bəzi sanksiyaların aradan qaldırılmasını təklif edir. Əvəzində İranın ən azı bir il müddətinə uranın zənginləşdirilməsi prosesini tamamilə dayandırması tələb olunur. Bu razılaşma gələcəkdə problemin tam həllinə yol aça bilər".
Politoloqun fikrincə, Donald Tramp yeni müharibə istəmir:
"ABŞ üçün yeni hərbi münaqişə və artan hərbi xərclər arzuolunan deyil. Odur ki, diplomatik razılaşma həm nüvə silahının qarşısının alınması, həm də İran-ABŞ arasında hərbi toqquşma ehtimalının sıfıra endirilməsi baxımından mühüm əhəmiyyət daşıyır".
