Bu bizi ağrıtsa da, rayonun hər məhəlləsinin yenidən qurulduğunu görmək bizi rahatladır
Tezliklə möhtəşəm şəkildə qurulmuş Ağdam yaşamaq üçün qapılarını hər kəsin üzünə açacaq
Azərbaycanın Qarabağ bölgəsində yerləşən Ağdam rayonu, təkcə coğrafi mövqeyi ilə deyil, həm də tarix boyu üzləşdiyi faciələrlə yadda qalıb. 1993-cü ildə Ağdam rayonunun böyük hissəsi Ermənistan silahlı qüvvələrinin işğalına məruz qaldı. İşğal nəticəsində şəhər tamamilə dağıdıldı, yaşayış binaları, məktəblər, mədəniyyət ocaqları, məscidlər viran qoyuldu. Ağdam “Qafqazın Xirosiması” adlandırılmağa başlandı.
Lakin 2020-ci ildə 44 günlük Vətən müharibəsi nəticəsində Ağdam qan tökülmədən işğaldan azad edildi. Azərbaycan Ordusunun şanlı zəfəri ilə düşmən geri çəkildi və Ağdam yenidən öz sahiblərinə qovuşdu. Hazırda rayonda genişmiqyaslı bərpa və yenidənqurma işləri aparılır, yeni yollar çəkilir, məktəblər və xəstəxanalar inşa olunur.
Bir zamanlar xarabalığa çevrilmiş Ağdam bu gün yenidən dirçəlir, əvvəlki həyatına qayıdır və gələcəyə ümidlə baxır. Bu dəyişikliklər Ağdamın həm işğal dövründəki faciəsini, həm də azadlıqdan sonrakı quruculuq ruhunu əks etdirir.
Jurnalistlərə Hüquqi və Texniki Yardım” İctimai Birliyinin sədri, araşdırmaçı jurnalist, əslən Qarabağdan olan Asəf Quliyev “Sherg.az”a deyib ki, vaxtilə Ağdam və ümumilikdə Azərbaycanın digər erməni təcavüzünə məruz qalmış ərazilərinin işğal planı Moskvada hazırlanmışdı:
"İşğal prosesi Ermənilər və rus silahlı qüvvələrinin birgə səyi ilə həyata keçirilmişdi. Torpaqlarımızın azad edilməsi nəticəsində zəfərin qazanılması Azərbaycanın ordusu və Ali Baş komandanın iradəsinin təntənəsi idi. Ramiz Rövşənin dediyi kimi, "ermənilər Qarabağı işğal etdilər, amma Ağdamdan qisas aldılar". Ağdamın dağıdılması, son kərpicinə qədər sökülməsi bunun bariz nümunəsidir. Təsəvvür edin ki, hərdən beynəlxalq təşkilatlarla təmasda olanda onlara deyirəm ki, 5 ildir Ağdam azad olunsa da, orada yaşaya bilmirəm. Bu fikrim onlarda maraqlı təəccüb doğurur ki, görəsən, niyə öz doğma torpağında yaşamır? Mən onların sual dolu baxışlarına cavab verirəm ki, çünki Ağdamda nəyinki mənim, kiminsə yaşaması üçün nəsə qalmamışdı. Bu gün Ağdamın yenidən tikilib-qurulması insanın ürəyini açır. 2 aydan bir, bəzən də daha tez-tez oranı ziyarət edirəm".
Müsahib vurğulayıb ki, hər dəfə Ağdama gedəndə arabir yolları qarışdırır:
"Çünki rayonda o qədər sürətli və fundamental işlər görülür ki, hər dəfə burada fərqli yeniliklə qarşılaşıram. Bütün bunlar məni təəccübləndirir və sevindirir. Təbii ki, kədərli məqamlar da mövcuddur. Ona görə ki, bizim vaxtilə yaşadığımız və xatirələrimizdə olan Ağdam artıq yoxdur. Bu bizi ağrıtsa da, rayonun hər məhəlləsinin yenidən qurulduğunu görmək bizi rahatladır. Əminəm ki, tezliklə möhtəşəm şəkildə qurulmuş Ağdam yaşamaq üçün qapılarını hər kəsin üzünə açacaq.
