Lavrov NATO-nun müxtəlif bayraqlar altında fəaliyyətini vurğulması Türkiyəni də nəzərdə tutması deməkdir
Rusiya xarici işlər naziri Sergey Lavrovun sözlərinə görə, Moskva heç bir halda Ukraynada Avropa sülhməramlılarının yerləşdirilməsini qəbul etməyəcək.
O, NATO qoşunlarının istənilən formada, o cümlədən sülhməramlı qüvvələr adı altında Ukraynada olmasını Rusiya üçün ciddi təhdid kimi qiymətləndirib.
Lavrov bildirib ki, Rusiya üçün əsas məsələ ərazilər deyil, orada yaşayan insanlardır və məhz onların təhlükəsizliyi prioritet təşkil edir. O, həmçinin qeyd edib ki, 2014-cü ildə ABŞ, Avropa İttifaqı və Kiyev arasında Ukraynanın federallaşdırılması məsələsi ciddi müzakirə olunurdu və o zaman Krım məsələsi artıq həll olunmuş sayılırdı. Lakin Ukraynanın bu razılaşmaları yerinə yetirməməsi nəticəsində daha çox ərazi itirdiyini vurğulayıb.
Tanınmış jurnalist, politoloq Fuad Abbasov “Sherg.az”a bildirib ki, Rusiyanın şovinist siyasəti onun sərhədlərinin qurtardığı yeri qonşu dövlətlərin ərazisi saymamasıdır:
“Rusiyanın Qərb sərhədləri Ukrayna, Belarusiya, Litva, Latviya və Estoniya, eyni zamanda Cənub sərhədləri Azərbaycan, Gürcüstan, Ermənistan, Uzaq Şərq sərhədləri isə Monqolustan, Qazaxıstan sayılır. Yəni Rusiya öz sərhədlərinin qurtardığı yeri qəbul etmir və qonşu dövlətlərin torpaqlarını özünə bufer zona hesab edir. Bu isə Lavrovun dilindən çıxan şovinist siyasətin bariz nümunəsidir. Türkiyə prezidenti Rəcəb Tayyib Ərdoğan Ukrayna lideri Vladimir Zelenski ilə görüşdüyü zaman türk ordusunun rəsmi Kiyevə göndərilərək orada sülhməramlı kontingent kimi çıxış edə biləcəyini söyləmişdi. Bu isə Rusiya üçün sürpriz qərar olmuşdu. Çünki türk ordusu Avropa yox, NATO ordusu sayılır. Türk ordusu Xaç yürüşünün varislərindən fərqlənir. Lavrovun Avropanın deyil də türk ordusunun Ukraynaya gedəcəyi təqdirdə necə reaksiya verəcəyi sual altındadır. Lavrov bu açıqlaması ilə Rusiyanın şovinist xislətini göstərdiyi kimi Ərdoğanın da Ukraynanın bütünlüyünü qorumasını və türk ordusunun Türkiyə sərhədindən kənarda nüfuzunu vurğulamış oldu. Ona görə də Lavrov NATO-nun müxtəlif bayraqlar altında fəaliyyətini vurğulması Türkiyəni də nəzərdə tutması deməkdir”.
