Ermənistan Türkiyə və Azərbaycanla enerji əlaqələrini genişləndirməklə elektrik enerjisinin ixracı və idxalı üçün yeni imkanlar əldə edə bilər. Lakin bu əməkdaşlığın iqtisadi səmərəsi qiymətlərdən və texniki şərtlərdən asılı olacaq.
Ermənistanın ərazi idarəetməsi və infrastruktur nazirinin keçmiş müavini Akop Vardanyanın sözlərinə görə, Türkiyə ilə Gümrü-Qars elektrik verilişi xəttinin bərpası Ermənistana təxminən 150 MVt həcmində elektrik enerjisi ixrac etmək, eləcə də qəza və fövqəladə hallarda Türkiyədən enerji idxal etmək imkanı yarada bilər.
Vardanyan bildirib ki, Türkiyə tərəfində xəttin təxminən 60 kilometrlik hissəsi sökülüb, Ermənistan ərazisində isə infrastruktur əsasən qorunub saxlanılıb. Türkiyə ilə enerji sistemlərinin sinxronlaşdırılması üçün xüsusi çevirici yarımstansiyanın tikintisi tələb oluna bilər. Onun qiymətləndirməsinə görə, bu qurğunun tikintisi təxminən 500 milyon dollara başa gələ bilər.
Keçmiş nazir müavini vurğulayıb ki, yeni elektrik xəttindən yalnız qiymətlər və şərtlər sərfəli olduqda istifadə etmək məqsədəuyğundur.
O, həmçinin Azərbaycanın elektrik şəbəkəsi ilə əlaqənin Ermənistanın şərq hissəsinin enerji sistemi ilə sinxronlaşdırılması vasitəsilə əlavə iqtisadi imkanlar yarada biləcəyini qeyd edib.
