Son günlər təcili tibbi yardıma əlçatımlılıq və onların işi barədə şikayətlər artıb. Məlumdur ki, vətəndaşların ən çox narazı qaldığı məqam təcili yardım briqadasının gec gəlməsidir. Hətta bu hal dəfələrlə təkrarlanıb. Budəfəki şikayət isə tamamilə fərqlidir. Adının çəkilməsini istəməyən oxucumuz bildirir ki, ölkəmizdə koronavirusun kəskinləşdiyi bir zamanda təcili tibbi yardım nəinki gecikib, ümumiyyətlə vətəndaşa xidmətdən imtina edib.
39 dərəcə temperarturda olan xəstə üçün briqada çağırılsa da, vətəndaşa cavab olaraq bu sözlər deyilib: “39 dərəcə o demək deyil ki, həmin şəxs COVİD-dir. Temperatur ancaq 40 olduqdan sonra gələ bilərik”.
Səhiyyə sistemindəki bəzi neqativlikləri zaman-zaman müşahidə etmişik. Lakin bu dəfəki olay tamamilə məsuliyyətsizlik və özbaşınalıqdan xəbər verir desək, yanılmarıq.
Baş verənləri “Sherg.az”a dəyərləndirən ictimai-siyasi xadim, həkim Zəlimxan Məmmədli söyləyib ki, bu zamana qədər səhiyyə sisteminin naqislikləri barədə çox danışsaq da, heç bir müsbət dəyişiklik baş vermir:
“İndi Səhiyyə Nazirliyi, TƏBİB və onun törəmələri arasında konkret olaraq rəqabət getdiyini müşahidə edirik. Ancaq təcili tibbi yardım vətəndaşın çağırışına mütləq cavab verməlidir. 39 dərəcə temperatur adi bir hal deyil. Təcili tibb yardım birmənalı olaraq vətəndaşın çağırışına dolğun cavab verməlidir. Çünki 39 dərəcəni aşmış temperatur xəstədə və onun çevrəsində həyəcan yaradır. Xüsusilə, insanlarda COVİD-19 qorxusu var. Son zamanlarkı təbliğat da bu istiqamətdə qurulur ki, insanları qorxutmaq olmaz.
Təcili tibbi yardımla bağlı mən də xoşagəlməz hadisə ilə qarşılaşmışam. Temperaturlu xəstə üçün gələn təcili tibbi yardım “bu xəstə COVİD 19-a yoluxub” deyirdi. Amma heç bir test aparılmadan, təhqiramiz ifadələrlə xəstəni qorxudurdular. Ümumiyyətlə, belə hallar səhiyyə sistemimizdəki naqislikləri, ayrı-ayrı səhiyyə sturukuturlarının vətəndaş qarşısında məsuliyyətsizliyidir”.
Z.Məmmədli qeyd edib ki, səhiyyə sistemimiz vətəndaşın sağlamlığına effektiv xidmət etməli olduğu halda, əlavə stressə səbəb olacaq hallara yol verir:
“Səhiyyəmizdə ciddi islahatlar aparılmalıdır, vətəndaş qarşısında məsuliyyət dərəcəsi yüksəlməlidir, insanları incidən addımlar yolverilməzdir. Mövcud qanunlarımızda da var ki, bununla bağlı müəyyən məsuliyyət müəyyən olunub. Təəssüf ki, heç bir cavabdehlik yoxdur və məsuliyyət hiss olmadığı üçün belə hallar yaşanır. Səhiyyə sahəsində ciddi islahatlar olmasa, belə neqativ hallar və epizodlar zaman-zaman təkrarlanacaq”.
