Almaniyanın xarici işlər naziri Annalena Berbok Rusiya iqtisadiyyatına tətbiq edilən sanksiyaların effekt verməməsindən təəssüflənir.
O, Rusiyaya qarşı məhdudiyyətlərin gözlənilən iqtisadi nəticə vermədiyini qeyd edib. Berbokun fikrincə, avtokratik rejimlərdə demokratiya məntiqi işləmir: “Bu müharibəni sivil hökumətlərin rasional qərarları və raional tədbirləri ilə bitirmək olmaz”.
Məsələyə aydınlıq gətirən politoloq Natiq Miriyev "Sherg.az"a açıqlamasında bildirib ki, bunun səbəbi ABŞ başda olmaqla Qərb dünyası və Avropa birliyi ölkələrinin vahid formada fəaliyyət göstərməməsidir:
"Hər bir Avropa dövlətinin geosiyasi və geoiqtisadi maraqları kontekstində bəzi Rusiyaya yönəlik fərqli qərarları müşahidə edirik. Rusiya müdafiə sənayesinə gələn elektron cihazları məhz Qərb şirkətləri vasitəsilə alır. Müharibə başlayandan bəri dayanmayıb. Əlbəttə, bunun müəyyən ziyanları da var. Hazırda istehsal olunan ballistik raketlərin əksəriyyəti Qərb dünyasından ixrac olunan həmin elektron cihazların, çiplərin və digər qurğuların vasitəsilə hazırlanır. Bunu edən isə ABŞ və Avropa şirkətləridir. Ermənistan və bəzi Orta Asiya ölkələri Qərb dövlətlərindən elektron cihazları ixrac edirlər. Daha sonra isə sənədləri dəyişərək Şimal qonşumuza ikinci bir ixracı təmin edirlər. Bu isə iqtisadi sanksiyaların dəlinməsinə şərait yaradır. Nəticə etibarilə Rusiyada balllistik raketlərin və çox strateji silahların istehsalı prosesi dayanmır. Rusiya Ukraynanın bütün infrastrukturlarını, mərkəzi şəhərlərini və hərbi obyektlərini hədəfə almağa davam edir. Qərb ölkələri prosesi əvvəldən indiyədək tənzimləyə bilməyib. Avropa Birliyi, NATO və ABŞ-da bu koalisiya çərçivəsində Ukraynaya dəstəklə bağlı çevik qərarlar qəbul edə bilməyib. Müharibənin dayanmama və Rusiyanın dirəniş göstərməsinin əsas səbəbi budur. Ukraynaya hərbi dəstək məsələsində hələ də Qərb dünyasında fikir ayrılıqları mövcuddur. Ukraynanın bəzi ərazilərini Rusiyaya təhvil verməklə müharibəni dayandırmaq fikrində olanlar var. Ona görə də belə problemlər ortaya çıxır. Yaxın zaman çərçivəsində problemləri həll etmək mümkün olmayacaq. Rusiya tamamilə təcrid olunmayıb. Rəsmi Moskva Çin, Hindistan və digər Asiya ölkələri ilə intensiv şəkildə əməkdaşlıq edir. Öz enerji daşıyıcılarını onlara satır və müəyyən silahlar alır. Bu da Rusiyanın hərbi müdafiə saneyesinin yenə fəaliyyət göstərməsinə imkan yaradır".
