Əgər Yerevan təklifləri qəbul edərsə, Türkiyə təbii ki, hava məkanını açacaq. Azərbaycan isə buna etiraz etmir
Türkiyə ilə Ermənistan arasında hava sərhədlərinin açılması barədə danışıqlar gedir. “Armeniya” aviaşirkətinin direktor müavini Gevorq Xaçatryan məsələ ilə bağlı davamlı danışıqlar apardığını söyləyib. Xaçatryan qeyd edib ki, Türkiyənin hava sərhədlərini bağlı saxlaması bilet qiymətlərinə öz təsirini göstərir. Onun sözlərinə görə, mart-aprel aylarında şirkət Türkiyədən hava məkanının açılmasını istəsə də, “yox” cavabı alıb. O qeyd edib ki, hazırda danışıqlar davam edir və müsbət irəliləyiş var.
Türkiyə ilə Ermənistan arasında münasibətlərin normallaşdırılması istiqamətində Ankaradan təkliflərin olduğunu deyən MCP sədrinin müavini, politoloq Məhəmməd Əsədullazadə "Şərq"ə açıqlamasında bildirib ki, Türkiyə Prezidenti cənab Ərdoğan tərəfindən verilən mesajlar Ermənistan cəmyyətində müəyyən polemikaya səbəb olub. Politoloq qeyd edib ki, Ermənistan Baş naziri Nikol Paşinyan da sərhədlərin açılmasında, sülhün əldə edilməsində, kommunikasiyaların bərpasında maraqlı kimi görünür:
"Təbii ki, bu xüsusda danışıqlar gedir. Türkiyə və Ermənistan arasında hava yollarının qarşılıqlı açılması, əlbəttə ki, tərəflər arasındakı danışıqlardan asılı olacaq. Türkiyənin təklifi ondan ibarətdir ki, ilk növbədə Ermənistan Azərbaycanın və Türkiyənin ərazi bütövlüyünü tanımalıdır. Xüsusilə Zəngəzur dəhlizinin açılmasını reallaşdırmalıdır.
Ona görə də Türkiyə Ermənistana bu istiqamətdə təzyiqlər edir. Düşünürəm ki, danışıqlar prosesində Ermənistan baş naziri ciddi diplomatk addım atarsa, o zaman hava məkanının açılması reallaşa bilər. Hazırda bilirsiniz ki, Ermənistan həm yerüstü, həm də hava xəttindən blokadadır.
Bu da Ermənistanda sosial, iqtisadi vəziyyətə mənfi təsir edir. Düşünürəm ki, müharibədən sonra hazırkı vəziyyətin normallaşdırılması Ermənistanın atacağı addımlardan asılıdır. Əgər Yerevan təklifləri qəbul edərsə, Türkiyə təbii ki, hava məkanını açacaq. Azərbaycan isə buna etiraz etmir".
