Azərbaycan və İsrailin xarici işlər nazirləri Ceyhun Bayramov və Gideon Saar Əbu-Dabidə (BƏƏ) görüş keçiriblər.
Bu barədə Azərbaycan XİN X sosial şəbəkəsində paylaşım edib.
İki ölkə arasında siyasi, iqtisadi, ticarət, investisiyalar, humanitar sahələr üzrə əməkdaşlığın inkişaf perspektivləri müzakirə olunub, Azərbaycan Respublikası Hökuməti ilə İsrail Dövləti Hökuməti arasında Birgə Komissiyanın rolu qeyd olunub. Tərəflər habelə yüksək texnologiyalar, səhiyyə və təhsil sahələrindəki təcrübə mübadiləsinin gücləndirilməsinin əhəmiyyətini vurğulayıblar.
Ölkəmizin Yaxın Şərq regionunda sülh və sabitliyin bərqərar edilməsini, o cümlədən İsrail-Fələstin münaqişəsinin beynəlxalq hüquq normaları əsasında sülh yolu ilə həlli prosesini dəstəklədiyi bir daha qeyd olunub.
Qarşı tərəf həmçinin postmünaqişə dövründə bölgədə mövcud vəziyyət və reallıqlar, işğaldan azad olunmuş ərazilərdə aparılan genişmiqyaslı bərpa və quruculuq işləri, mina təhdidi ilə mübarizə səyləri, habelə Azərbaycan-Ermənistan sülh prosesi barədə ətraflı məlumatlandırılıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Politoloq İlyas Hüseynov "Sherg.az"a söyləyib ki, Azərbaycan və İsrail arasında çox möhkəm dostluq münasibətləri mövcuddur:
"Azərbaycan Respublikasının İsraildə açılan səfirliyi ikitərəfli münasibətlərin inkişafına xidmət edir. Eyni zamanda BƏƏ-də iki ölkənin xarici işlər nazirlərinin görüşü siyasi-iqtisadi, humanitar sahədə olan əlaqələrin müzakirəsi qarşıdakı dövrdə yeni nəticələrə gətirib çıxara bilər. Digər tərəfdən hazırda yüksək texnologiyalar, səhiyyə və təhsil sahəsində təcrübə mübadiləsi aparılır. Önəmli məsələ bundan ibarətdir ki, İsraillə Azərbaycan arasında həm də hərbi-texniki sahədə də əməkdaşlıq genişlənməkdədir. Bu da ölkəmizin müdafiə qüdrətini artırır və təhlükəsizliyini bir qədər də möhkəmləndirir. Eyni zamanda investisiya və ticarət, eləcə də iqtisadi münasibətlərin inkişafı üçün yaxşı şərait mövcuddur. Üstəlik, İsrail dövlətinin dəstəyi ilə işğaldan azad olunmuş ərazilərin minalardan təmizlənməsi, Qarabağ və Şərqi Zəngəzura investisiya yatırılması üçün geniş imkanlar var".
Politoloqun sözlərinə görə, bu cür görüşlər, təmaslar həm də ölkəmizə yatırımın həcmini bir qədər də artıracaq:
"Nəticədə sözügedən məsələlər ticarət dövriyyəsinə müsbət təsir göstərəcək. Xüsusilə vurğulamaq lazımdır ki, bu gün dünyada parçalanmaların, müxtəlif dövlətlərin koalisiyaya qoşulmasının fonunda müəyyən fikir mübadilələri aparmaq və gələcəyə hesablanmış əməkdaşlıq formalaşdırmaq vacib rol oynayır".
