Qabil Hüseynli: "Ukraynanın ərazi bütövlüyü təmin olmayana kimi sülh danışıqları ola bilməz"
Kapitulyasiya yalnız Ukraynanın sülhə gəlməsinə kömək edəcək
Bunu Rusiya Təhlükəsizlik Şurası sədrinin müavini Dmitri Medvedyev deyib.
O bildirib ki, böhranın həllinin belə variantı nə Qərb, nə də Kiyev hakimiyyəti üçün qəbulediləndir: “Bölünmüş ölkənin səngərlərində əzab çəkən insanlara, həqiqətən, yalnız təslim olmaq lazımdır. Bu, bəlkə də sülhə yol açacaq. Amma nə Vaşinqton, nə də Kiyev sülh istəyir. Münaqişəyə son qoymaq istəməməsi ona gətirib çıxarır ki, Ukrayna ordusunun saxlanmasına milyardlarla dollar xərclənir. “Böyük əks-hücum” mifi “böyük dollar iqtisadiyyatı” mifini dəstəkləyir”.
Mövzu ilə bağlı “Sherg.az"a açıqlama verən tanınmış politoloq, sabiq dövlət müşaviri Qabil Hüseynli bildirib ki, bu səfeh adam növbəti dəfə səhvə yol verib. Onun dediyinə görə, guya, sülh Ukraynanın kapitulyasiyası baş verərsə ola bilər: "Medvedyev kapitulyasiyanın, həmçinin Ukraynanın ət çəkən maşına verdiyi insan itkilərinidə dayandıra biləcəyini vurğulayıb. O, bu sözləri ilə öz ölkəsinin beynəlxalq hüquqa zidd olaraq Ukraynaya vəhşicəsinə hücum etdiyini, törətdiyi vandalizmi qəbul etmiş oldu. Lakin görünən odur ki, bu açıqlamarı verərkən cəbhə bölgəsində Rusiyanın Ukraynaya nəzərən daha çox əsgər itkisi verdiyini unudur".
Politoloq qeyd edib ki, bu adamların tamamilə ağlı çaşıb. Törətdikləri hərbi cinayətlərə baxmayaraq, özlərini haqlı hesab edirlər. Medvedyev sübut etdi ki, Rusiyanın başlıca problemi alkoqolizm deyil, ağılsızlıq, dərrakəsizlik və milli idrakın lazımi səviyyədə olmamasıdır: "Medvedyevin Qərbin Ukraynanın sülhə doğru addım atmasına qarşı olması ilə bağlı verdiyi açıqlamalarda həqiqət payı yoxdur. Qərb tərəfi müharibənin bu gündə dayandırılmasına razı ola bilərlər. ABŞ müharibə dövründə 130 milyard dollardan çox pul xərcləyib. Onlar Ukraynaya bu maddi yardımları Rusiyanın özbaşınalıqlarına son qoymaq üçün göstərirlər".
"Ukraynanın ərazi bütövlüyü təmin olmayana kimi sülh danışıqları ola bilməz. Ukraynanın mövqeyi budur və mən bu mövqeyi haqlı hesab edirəm. Qərb əlbəttə istəyir ki, müharibə bitsin. Amma bunun üçün Rusiya öz qoşunlarını Ukraynanın ərazisindən çıxarmalı, Ukraynada törətdiyi vəhşiliklərə görə təzminat ödəməlidir”,- deyə Q.Hüseynli vurğulayıb.
