Ağdaş rayonunda 22 yaşlı oğlan atasını bıçaqlayıb.
Oxu.Az-ın məlumatına görə, hadisə Ağdaş şəhəri, Vaqif küçəsi, ev 44-də baş verib. Həmin ünvanda yaşayan, anadangəlmə nitq qüsurlu Həmid Elyazov (ad və soyad şərtidir) atasından pul istəyib. Atası ona 12 manat versə də, Həmid ondan daha artıq pul istəyib. Atası isə onu otaqdan qovub, əvəzində qızına bir manat verib.
Prosesdən əsəbiləşən Həmid mətbəxdən bıçağı götürərək atasını qorxudub, ondan daha çox pul tələb edib. Atası ikinci dəfə Həmidi otaqdan qovmaq istəyərkən o, əlindəki bıçaqla atasına hücum edib və ona 3 zərbə endirib.
Yaralı xəstəxanaya yerləşdirilib.
Faktla bağlı cinayət işi başlanıb və H.Elyazov saxlanılıb.
Şəki Ağır Cinayətlər Məhkəməsində təqsirləndirilən şəxsə hökm oxunub. Məhkəmə H.Elyazovu hadisəni törədərkən anlaqsız vəziyyətdə olması qərarına gəlib və onu cəzadan azad edib. H.Elyazov məcburi müalicəyə göndərilib.
Psixoloq Sevinc Baxışova “Sherg.az”a bildirib ki, indiki dövrdə qlobal, iqtisadi, siyasi, ekoloji , maddi , psixoloji, iş həyatında isə stress, aqressiya, konfliktlər və digər problemlər var:
“Müasir dövrdə geniş yayılmış problemlərdən biri də ailə daxilində olan konfliktlərdir. Son illər ərzində xalqımızın mənəvi dəyərlər sistemi ciddi devalvasiyaya uğrayıb və anormal istiqamətdə dəyişməkdədir. Ailənin əsasında ən başlıca rol oynayan valideynlərin sayəsində övlad böyüyüb, boya-başa çatır, tərbiyə alır. Əgər ailənin təməli düzgün qurularsa, onun “xəstələnmək” və dağılmaq təhlükəsi də az olar. Ailədə verilən düzgün tərbiyə uşağın gələcək inkişafını tənzimləyir.Ona görə də istər boşanmış ,istərsə də münasibətlərində problemi olan ailələrdə valideynlər uşaq tərbiyəsində mümkün qədər öz çətinliklərini arxa plana atmalı, uşağın yanında bunu hiss etdirməməlidirlər. Valideynlər öz məsuliyyətlərini dərk etməli, bir insan yetişdirdiklərini unutmamalıdırlar. Problemi olmayan uşaq yoxdur. Ancaq onları aradan qaldırmaq mümkündür. Mühüm olan onlarla qurduğunuz rabitə və tərbiyə üsuludur. Əgər tərbiyə üsulu yanlış olarsa, ya da kobudcasına təqdim edilərsə, uşaq onu qəbul etməyəcək. Yaxşı ailə odur ki, layiqli bir tərbiyə üsulu tərtib edə bilsin. Hər bir sahədə olduğu kimi, övlad tərbiyəsində də sözsüz ki, problemlərlə üzləşəcəyik. Əgər valideynin düzgün tərbiyə üsullarından xəbəri varsa, övlad tərbiyəsində müvəffəqiyət qazanar. İndiki şəraitdə çağdaş dünyamızda gedən proseslər, qloballaşma, texnologiyanın inkişafı, inteqrasiya prosesi, internet və virtuallaşma kimi yeni düşüncə-informasiya modellərinin zərbələri Azərbaycan ailəsindən də yan keçməyib. Müasir ailənin formalaşması və fəaliyyət göstərməsinə spesifik şərait təsir göstərir. Ailələrin qorunması üçün dünyanın bir çox yerlərində həmçinin ölkəmizdə bir sıra tədbirlər görülür. Problemlərin aradan qaldırılması ailəni daha möhkəm və davamlı edir”.
