1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan edib. Bununla da xalqımızın çoxəsrlik dövlətçilik ənənələrini davam etdirib. Qısa dövr ərzində Azərbaycanın ilk parlamenti, hökuməti yaradılıb. Dövlət atributları təsis olunub, sərhədləri müəyyən edilib, dövlət quruculuğu sahəsində mühüm tədbirlər həyata keçirilib. Cümhuriyyətin beynəlxalq münasibətlər sisteminin subyekti kimi tanınması, diplomatik müstəvidə milli maraqların qorunması istiqamətində mühüm addımlar atılıb.
Yeni fəaliyyətə başlamış parlamentin qəbul etdiyi qanunlar milli müstəqilliyin möhkəmləndirilməsində, ölkədə siyasi, iqtisadi və mədəni inkişafın təmin olunmasında, demokratik prinsiplərin təsbit edilməsində əsaslı rol oynayıb. Cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərib.
1991-ci il oktyabrın 18-də “Azərbaycan Respublikasının dövlət müstəqilliyi haqqında ” Konstitusiya Aktı qəbul olunub. Konstitusiya Aktında 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad olunmuş, Azərbaycan Respublikasının Azərbaycan Xalq Cümhuriyyətinin varisi olduğu təsbit edilib. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa edib. 2021-ci il oktyabrın 18-də Azərbaycan Respublikasının müstəqilliyinin bərpa edilməsinin 30 ili tamam olur. Azərbaycan xalqı 1991-ci ildən sonra ilk dəfə bu bayramı tam fərqli olaraq, öz ərazi bütövlüyünü bərpa etmiş qalib xalq kimi qeyd edir. Bu baxımdan dövlətçilik tariximizdə müstəsna əhəmiyyətli mərhələlərin, xüsusən müstəqilliyin əldə edilməsi və bərpası kimi tarixi günlərin onların mahiyyəti və məzmununa uyğun daha dəqiq ifadə olunması böyük önəm kəsb edir. 2021-ci il oktyabrın 15-dən Respublika gününün adı dəyişdirilərək Müstəqillik Günü olub.
Azad olunmuş torpaqlarda Müstəqillik Gününün qalib ölkə kimi qeyd edilməsinin əhəmiyyətindən danışan fəlsəfə üzrə fəlsəfə doktoru, dosent Faiq Ələkbərli öz fikirlərini "Sherg.az" la bölüşüb:
"Torpaqlarımızın düşməndən azad edilməsi və Müstəqillik Gününün o torpaqlarda keçirilməsi bütövlükdə xalqın özünə olan inamını bərpa etdi. Qaçqın və məcburi köçkünlərin bayramlarının üzərinə bir bayram da əlavə olundu. Bayramlarımızı dədə-baba yurdumuzda qeyd edəcəyik sözü artıq gerçək oldu və bütün bu hadisələr yetişən gənc nəslin formalaşmasında mühüm rol oynayır.
Bu günləri bizə yaşatdıqları üçün Şəhidlərimizi hörmətlə anır və qazilərimizə minnətdarlığımı bildirirəm. Biz artıq hər yerdə çəkinmədən müstəqilliyimizi və ərazi bütövlüyümüzü dilə gətirə bilərik".
Nihat Müzəffər
