Türkiyə-Azərbaycan Peşə Təhsili Qurumunun Əsasnaməsi imzalanacaq. Bu, Türkiyə-Azərbaycan iqtisadi əməkdaşlığına dair fəaliyyət planında əksini tapıb. Sənəddə qeyd edilib ki, 2021-ci ildə Türkiyə-Azərbaycan Peşə Təhsili Qurumu Əsasnaməsi qarşılıqlı razılaşma ilə tamamlanacaq və imzalanacaq. Bu işlərin həyata keçirilməsi Azərbaycan və Türkiyənin Təhsil nazirliklərinə tapşırılıb.
Təhsil eksperti Nadir İsrafilov “Sherg.az”a açıqlamasında sözügedən təşəbbüsü yüksək qiymətləndirdi:
“Təəssüf ki, peşə təhsili uzun müddət diqqətdən kənarda qalmışdı. Sonradan başa düşdülər ki, bu sahə müasir dövrün tələbidir. Beləliklə, maraq artdı, peşə təhsili haqqında xüsusi Qanun qəbul olundu. Bu sahədə Türkiyə ilə əməkdaşlığa başladıq. Peşə təhsilinə maraq təxminən otuz faiz çoxalıb. Nəzərə almaq lazımdır ki, Avropa ölkələri məhz peşə təhsili sayəsində tərəqqi edir. Almaniyada ali məktəblərdən çox peşə məktəbləri var. Əlbəttə, bu, təsadüfi deyil. Sadəcə yeni iş yerləri açılmalıdır ki, peşə məktəbini bitirənlər işsiz qalmasınlar”.
