Bakı Türk Təhsil Qurumları Əsasnaməsi imzalanacaq. Bu, Türkiyə-Azərbaycan iqtisadi əməkdaşlığına dair fəaliyyət planında əksini tapıb. Sənəddə qeyd edilib ki, 2021-ci ildə Bakı Türk Təhsil Qurumları Əsasnamə qarşılıqlı razılaşma ilə tamamlanacaq və imzalanacaq. Bu işlərin həyata keçirilməsi Azərbaycan və Türkiyənin Təhsil nazirliklərinə tapşırılıb.
Təhsil eksperti Elçin Əfəndi “Sherg.az”a açıqlamasında sözügedən sənədin əhəmiyyətini yüksək qiymətləndirdi:
“Azərbaycanla Türkiyə arasında digər sahələrlə yanaşı, təhsildə də iş birliyi davam edir. Müəyyən qarşılıqlı layihələr planlaşdırılır. Və bu, daha çox peşə təhsili ilə əlaqədardır. Qəbul qaydalarında, proqramların hazırlanmasında müəyyən yeniliklər gözlənilir. Bildiyiniz kimi, Azərbaycanda Rusiyanın iki ali məktəbi var. Gələcəkdə Türkiyənin də müvafiq universitetlərinin, o cümlədən tibb təhsili verən ali məktəblərin filiallarının açılması istisna deyil. Hər halda təhsil sahəsindəki əməkdaşlığımız gələcəklə bağlı nikbin proqnozlar formalaşdırır”.
