Dövlət İmtahan Mərkəzinin Direktorlar Şurasının sədri Məleykə Abbaszadə bildirib ki, 1-ci ixtisas qrupu üzrə dövlət sifarişli yerlərin sayı 10 mindən yuxarıdır.
Onun sözlərinə görə, bu qrupda 200 bal toplayanların hamısının ali məktəblərə qəbul olma şansı var:
“Əgər abituriyentlər düzgün ixtisas seçimi etsələr, ali məktəblərə qəbul olunacaqlar”.
M.Abbaszadə həmçinin 2-ci və 3-cü ixtisas qrupu üzrə ödənişsiz yerlərin sayının artacağını da qeyd edib.
Məsələ ilə bağlı “Sherg.az”a danışan təhsil üzrə ekspert Elşən Ramizoğlu bildirib ki, keçid ballarının ifrat dərəcədə enməsi heç də yaxşı hal deyil:
“Biz də istəyirik ali məktəbə qəbul olmaq istəyənlər öz arzularına çatsın. Ancaq məqsədsiz ali məktəbə daxil olmaq heç də uğurlu olmur.
Bilirsiniz, bəzən ixtisas seçərkən əmək bazarının tələbatını fikirləşmirik. 200 bal toplayan hansısa bir ixtisası seçdi, qəbul oldu, bununla da məsələ bitdi? 4 ildən sonra ali məktəbi bitirib gələcək, bəs iş prosesi?
İnsan istəmədiyi ixtisası seçəndə, ali məktəbə qəbul olmaq xətrinə tələbə olanda, sabah o ixtisası üzrə sevərək işləməyəcək. Türkiyədə ali məktəbə qəbul olunmaq asandır, ancaq bitirmək çətindir.
Ancaq bizdə daxil olmaq daha çətindir. Buna görə də bu istiqamətdə keçid ballarının düşməsi, 200 bal toplayanların hər birinin qəbul olunmaq şansının olmasını doğru saymıram. Buna güzəşt desək belə, bu, doğru yanaşma deyil.
2-ci qrup üzrə kifayət qədər tələbata uyğun ixtisaslar var, burada ödənişsiz yerlərin sayının çox olması yaxşı haldır. Bəzən elə şəxslər olur ki, təhsil haqqına görə oxuya bilmirlər. Ona görə ödənişsiz yerlərin sayının çox olmasını dəstəkləyirəm”.
