Dekabrın 27-də Milli Məclisin payız sessiyasının növbəti plenar iclası keçirilib. Cari məsələlərlə bağlı çıxış edən deputatlar bəzi aktual məsələlərə toxunublar. Millət vəkili Məlahət İbrahimqızı məktəblərdə qadın müəllimlərin çoxluğuna narahatlığını ifadə edib. Onun sözlərinə görə, bu gün orta məktəblərdə müəllimlərin mütləq əksəriyyəti qadındır.
Oxşar fikirləri təhsil naziri Emin Əmrullayev də səsləndirib. Nazir vurğulayıb ki, qadın müəllimələrin sayı çoxdur. E.Əmrullayevin fikrincə, kişi müəllimlərin sayının artırmaq lazımdır.
Qeyd edək ki, Azərbaycan məktəblərdə müəllimlərin 71 faizini xanımlar, 29 faizini isə kişilər təşkil edir.
Kişi müəllimlərin az olmasının səbəblərini “Sherg.az”a açıqlayan təhsil eksperti Nadir İsrafilov bildirib ki, bu məsələ diqqət mərkəzində saxlanılır:
“Həqiqətən də kişi müəllimlərin məktəbdə sayı azlıq təşkil edir. Lakin bu statistika yalnızca Bakı şəhəri üçün keçərlidir. Regionlarda belə bir problem, demək olar ki, yoxdur.
Bir sıra ekspertlər təhsil müəssisələrində kişilərin qadınlardan az olmağının səbəbini gender bərabərsizliyi ilə, əməkhaqqı ilə əlaqəndirirlər.
Bu məsələdə maddiyyat əsas faktordur. Görünür ki, məktəb müəllimlərinə verilən əməkhaqları qane etmədiyi üçün repetitorluqla məşğul olurlar.
Ümumilikdə isə təhsil işçilərinin əməkhaqlarının artırılması istiqamətində müvafiq addımlar atılıb. Gələcəkdə Milli Məclisdə kişiləri müəllim olmağa stimullaşdıran qərarlar qəbul ediləcək”.
Xanlar ƏLİBƏY
