CHP Başqanı Özgür Özəl, həbsdə olan Əkrəm İmamoğlu və digər məhbusları cəzaevində ziyarət edib. Ziyarətdən sonra kameralar qarşısına keçən Özəl, İmamoğlunun bir otelə girərkən çəkilən görüntüləri ilə bağlı “Kameraların bağlanması məcburi bir tədbirdir” açıqlamasını verib.
Sherg.az xəbər verir ki, Özgür Özəl, istintaq dosyasına daxil olan və İmamoğlunun bir oteldə keçirdiyi görüşdən əvvəl mühafizəçilərin gəlib kameraları lentlə bağlaması görüntüləri ilə bağlı bunları deyib:
"Bu, dövlətin qoruma təlimlərində VIP olaraq adlandırılan xüsusi qoruma statusundakı şəxslərin qatıldıqları görüşlərdə, görüşün keçiriləcəyi salonda əgər təhlükəsizlik kamerası varsa, onun bağlanması dövlət məmuru polislərə tapşırılmış bir vəzifədir.
Heç utanmadan, çəkinmədən elə göstərirlər ki, guya Əkrəm bəy gizli bir şey edəcəkmiş də ona görə kameranı bağlatdırıb. Mənim iştirak etdiyim salonlarda da kameralar bağlanır, cənab Tayyib Ərdoğanın iştirak etdiyi salonlarda da bağlanır.
Bundan əlavə, "çantada pul varmış" deyirlər. O çantanın içində jammer (siqnal kəsici cihaz) var. Bütün proqramlarına baxın, görün ki, Əkrəm İmamoğlunun o çantası jammer çantasıdır. Siqnal kəsici cihaz qanunsuz dinləmələri önləmək üçün istifadə olunur. Əsas məqsədi isə siqnalları kəsməkdir."
