ABŞ Dövlət Departamenti Azərbaycanı dini azadlıqları pozulmuş ölkə elan ediləcək izləmə siyahısına daxil edib. Dövlət Departamenti bu qərarı Dini Etiqad Azadlığı üzrə Dövlət Komissiyasının (USCIRF) bu hesabatı əsasında qəbul edib. Hesabat din azadlığı ilə heç bir əlaqəsi olmayan əsassız tezislərlə doludur. Məsələn, hesabatda "Qubad İbadoğlunun "qondarma ittihamlarla" həbsi, 202 "siyasi məhbus", Azərbaycanın Qarabağ ərazisi ilə bağlı münaqişədə Ermənistana qarşı "hərbi cinayətlər törətmək" iddiası və s. Hesabatı oxuyanda ABŞ dövlət komissiyasının hesabatını yox, Poqosyan və ya Abovyan kimi hansısa erməni millətçisinin cəfəngiyyatını oxuduğunu görürsən. Hesabatı Daniella Aşbaxyanın rəhbərlik etdiyi dövlət komissiyasının ictimai xidməti hazırlayıb. Bu xanım ABŞ-da ən böyük erməni lobbi təşkilatı olan Amerika Erməni Assambleyasının, həmçinin Livanın Los-Ancelesdəki konsulluğunun direktorlarından biri olub. Yəni, əslində, xarici dövlətdə işlədikdən sonra Aşbaxyan ABŞ hökumətində xidmət etməyə gedib və xarici siyasəti müəyyən edən materiallar tərtib edib. Bu, Amerikanın xarici təsir qanunlarına görə qeyri-qanunidir. Yəni, O`Brayen Senatda açıq şəkildə Ermənistanın xeyrinə dövlət maraqlarını tapdalayandan sonra, indi erməni lobbisi ABŞ-ın xarici siyasətini açıq şəkildə müəyyənləşdirir. Və FTB Xarici Təsir İşçi Qrupu (Amerikanın dövlət qurumlarında xarici təsirlə mübarizə üçün hətta xüsusi bölmə də var) ənənəvi olaraq sadəcə dönər yeyir. Dövlət katibi Blinken 1991-ci ildən 2020-ci ilə qədər işğal olunmuş ərazilərdə 60-dan çox məscidi dağıdan və təhqir edənin Ermənistan olduğuna diqqət yetirmədən Azərbaycanı dini etiqad azadlığı ilə bağlı fövqəladə vəziyyətə namizədlər siyahısına əlavə etmək qərarına gəlib. Bayden administrasiyası öz qərarı ilə Ermənistan-Azərbaycan münasibətlərinin nizamlanmasında artıq kənarda qalan Fransaya sürətlə yetişir.
Millət vəkili Ceyhun Məmmədov "Sherg.az"a deyib ki, hər zaman olduğu kimi ABŞ Azərbaycanda dini münasibətlərə öz qərəzli mövqeyinə növbəti dəfə ortaya qoyub.
Deputat bildirib ki, 30 ilə yaxın işğal dövründə Qarabağda bütün məscidlərimiz, albanlara aid qədim dini məbədlərimiz barbarcasına dağıdılıb:
"Məscidlərimizdə donuz, inək saxlanılıb və ABŞ bugünədək erməni vandalizminə reaksiya verməyib. Bunun əksinə, Qarabağda mövcud olan ermənilərə aid abidələrin hamısı Azərbaycan tərəfindən qorunub, mühafizə edilib. Heç bir fakt ortaya qoya bilməzlər ki, hər hansı abidə, tikili Azərbaycan Ordusu, əsgərimiz tərəfindən dağıdılıb. Ən qərəzli məsələ odur ki, indiki Ermənistan ərazisində 300 məscidimiz, 500 məzarlıq dağıdılıb. İrəvanın mərkəzindəki Sərdar məscidi, Təpəbaş məhəlləsində Təpəbaşı məscidi dağıdılıb. Eyni zamanda tarixi Azərbaycan məscidi olan - Göy məscid "fars məbədi" kimi dünyaya təqdim olunmaqdadır. Bu da növbəti dəfə qərəzli, ikili münasibətlərin təzahürüdür. Bakının mərkəzində erməni kilsəsi, içərisində 5000 erməni dilində ədəbiyyatla qorunur. Bütün bunlar göstərir ki, Azərbaycanda dini azadlıqlarla bağlı heç bir problem mövcud deyil. Amerika rəsmilərinin hesabatı heç bir real fakta, sübuta əsaslanmır. Azərbaycanda bütün dini azlıqlara, fərqli dinlərə, məzhəb və təriqətlərə bərabər formada, daha yüksək imkanlar yaradılır. Ölkəmizdə bütün dinlərə aid abidələr qorunur, dövlət büdcəsindən yardımlar ayrılır. Eyni istiqamətdə işlər bugün Qarabağda da görülür. Narahatlıq üçün heç bir əsas yoxdur. Ona görə də ABŞ-nin qərəzli, yalan hesabatı Azərbaycan ictimaiyyəti tərəfindən qəbul edilmir. Yanaşma ədalətli olmalı, real faktlara əsaslanmalı idi".
