Bu gün PKK terror təşkilatının həbsdəki lideri Abdullah Öcalan növbəti dəfə tərəfdarlarına “silahı yerə qoyun” çağırışı edib.
İmralıdan videobağlantı vasitəsilə PKK üzvlərinə müraciət edən Öcalan onları dərhal tərksilah prosesinə başlamağa çağırıb.
“Mən silahın gücünə deyil, siyasətin gücünə inanıram. Sizi bu prinsipə əməl etməyə çağırıram”, - PKK lideri açıqlamasında deyib.
Öcalan qeyd edib ki, Kürdüstan Fəhlə Partiyası (PKK) milli dövlət yaratmaq məqsədindən əl çəkərək, əsas hərbi strategiyasından da imtina edib və mövcudluğunu bitirib.
Əvvəlki çağırışlar və danışıqlar prosesi
Qeyd edək ki, bundan əvvəl də PKK lideri tərəfdarlarına “silahı yerə qoyun” çağırışı edib. DEM Partiyasının rəhbərliyi İmralı adasında Öcalanla danışıqlar aparır. Türkiyə Prezidenti də DEM Partiya heyətini bir neçə dəfə qəbul edib.
Abdullah Öcalanın həbs tarixi
Xatırladaq ki, PKK lideri Abdullah Öcalan 26 ildir İmralı həbsxanasında saxlanılır. O, 1999-cu il fevralında Milli Kəşfiyyat Təşkilatının əməliyyatı nəticəsində Keniyada saxlanılıb və Türkiyəyə gətirilib. O, ölüm cəzasına məhkum edilsə də, hökm sonradan ömürlük həbs cəzası ilə əvəzlənib.
Türk siyasətçi və yazar Aydın Sezer "Sherg.az"a bildirib ki, Abdullah Öcalanın bu fikirləri onun təşkilat üzərindəki təsirini artıracaq və təşkilat tərəfindən ciddi qəbul olunmasını təmin edəcək:
"Bu məsələdə artıq əmin olacaqlar, yəni heç bir şübhə qalmayacaq. Həmçinin Abdullah Öcalanın bu çağırışından sonra PKK artıq Türkiyədə hərbi-silahlı aksiya keçirməyəcək.
Suriyada da artıq Suriya Demokratik Gücləri (SDG) ilə Cölani arasında bir anlaşma imzalanmışdı. Bu baxımdan, həmin çağırışın Suriyada da əks-səda doğuracağını söyləyə bilərik. Bu, Türkiyədə sülhün təmin olunması baxımından mühüm bir mərhələ, əhəmiyyətli bir addımdır. Lakin bildiyiniz kimi, PKK təşkilatı daxilində müxtəlif ölkələrin kəşfiyyat orqanlarının təsiri və müdaxiləsi mövcuddur. Bu səbəbdən, bundan sonra baş verə biləcək hadisələrdə həmin kəşfiyyat qurumlarının mümkün fəaliyyətlərini də nəzərə almaq vacibdir".
Siyasətçi vurğulayıb ki, ümumilikdə 40 ildən artıq davam edən terror prosesinin sona çatması, həm Türkiyə, həm də region üçün çox böyük əhəmiyyət kəsb edir:
"Bu sülh mühitini pozmaq istəyən, təşkilat daxilindəki xarici dövlətlərin uzantıları və ya xarici kəşfiyyat orqanlarının fəaliyyətlərinə qarşı da diqqətli olmaq lazımdır. Bu mərhələdən sonra PKK-nın bu cür fəaliyyətləri dayandıracağını artıq açıq şəkildə söyləyə bilərik".
