Son günlərdə İsrail-İran münasibətlərində artan gərginlik bölgədə vəziyyətin daha da mürəkkəbləşməsinə səbəb olub. Münaqişənin mümkün genişlənməsi ehtimalı, xüsusilə İranda yaşayan xarici ölkə vətəndaşlarının təhlükəsizliyini sual altına salıb. Belə bir kritik məqamda Azərbaycan regionda mühüm humanitar rola çıxış edərək, İranda yaşayan xarici vətəndaşların ölkədən çıxışına şərait yaradıb. Məlumata görə, bir sıra ölkələrin vətəndaşları, xüsusilə də həmin ölkələrin diplomatik nümayəndəliklərində çalışan şəxslər, Azərbaycanın ərazisindən istifadə edərək təhlükəsiz şəkildə İrandan çıxış ediblər. Bu proses Azərbaycan tərəfindən yüksək səviyyədə təşkil olunub və humanist yanaşma ilə həyata keçirilib. Ölkəmizin belə həssas situasiyada təşəbbüs göstərərək logistik dəhliz funksiyasını yerinə yetirməsi beynəlxalq ictimaiyyət tərəfindən də yüksək qiymətləndirilib. Azərbaycanın bu addımı həm regionda sülh və sabitliyin qorunmasına verdiyi töhfənin, həm də beynəlxalq humanitar prinsiplərə sadiqliyinin göstəricisidir. Xarici vətəndaşların mediaya verdikləri açıqlamalarda, eləcə də müvafiq ölkə rəsmilərinin Azərbaycan hökumətinə ünvanladığı təşəkkürlər bu dəstəyin nə qədər dəyərli olduğunu bir daha sübut edir.
Millət vəkili Naqif Həmzəyev Sherg.az-a söyləyib ki, İranda hazırda olduqca çətin bir vəziyyət yaşanır:
“İsrail-İran qarşıdurması günbəgün daha da gərginləşir. Belə bir şəraitdə İranda yaşayan xarici ölkə vətəndaşlarının, xüsusilə həmin ölkədə diplomatik fəaliyyət göstərən şəxslərin məhz Azərbaycan vasitəsilə öz ölkələrinə getmələrinə şərait yaradılması və dəstək göstərilməsi humanist addım kimi alqışlanmalıdır. Məncə, bu təqdirəlayiq bir nümunədir. Həmin şəraitdən istifadə edərək ölkələrinə qayıdan xarici vətəndaşların verdikləri müsahibələrdə Azərbaycana təşəkkür etmələri, eləcə də sonradan həmin ölkələrin rəsmi nümayəndələri və aidiyyəti qurumları tərəfindən səsləndirilən təşəkkür dolu açıqlamalar bizi məmnun edir və qürurlandırır. Ümid edirik ki, qonşuluğumuzda baş verən bu münaqişə tezliklə sona çatacaq və Azərbaycanın sərhədləri boyunca yerləşən ərazilərdə həmişə sülh və əmin-amanlıq hökm sürəcək".
