Bakıda Dünya dini liderlərinin II Sammiti keçirildi. Sammitin bəyannaməsində multikultiralizmin inişafının mühüm olması, dinin dövlətlər arasında dostluğu, sülhü təbliğ etməsinin önəmi vurğulandı. Belə böyük tədbirin ölkəmizdə baş tutmasının Azərbaycana böyük etimad və etibardan qaynaqlandığını söyləyənlər kifayət qədərdir.
“Mətbuatda multikulruralizm” kitabının müəllifi, jurnalist Niyaz Niftiyev düşünür ki, sammitin məhz Bakıda keçirilməsi heç də təsadüfi deyil.
O, Sherg.az-a bildirib ki, 2008-ci ildən başlayaraq Azərbaycan mədəni, dini və humanitar məsələlərin müzakirəsində mərkəz rolunu oynayır:
"Ötən müddət ərzində paytaxt Bakı demək olar ki, hər il bu kimi tədbirlərə ev sahibliyi edib. Əslində Azərbaycanın bu kimi tədbirlərə ev sahibliyi etməsinin obyektiv səbəbləri var. Əvvəla, Ümummilli lider Heydər Əliyevin siyasi iradəsi nəticəsində Azərbaycan, tarixən, sahib olduğu tolerant və multikultural ənənələrini hüquqi və siyasi müstəvidə uğurla inkişaf etdirdi. İllər öncə, Heydər Əliyev Azərbaycanın gələcək uğurlu inkişafı üçün dəqiq milli ideoloji hədəf seçdi, əsrlər boyu formalaşan çoxmədəniyyətlilik ənənəsini keyfiyyətcə yeni mərhələyə qaldırdı. Onun rəhbərliyi ilə Azərbaycan xalqının multikultural ənənələrinin qorunması sahəsində həyata keçirilən siyasi istiqamət hazırda Prezident İlham Əliyev tərəfindən inkişaf etdirilir. İkincisi, dünyada baş verən etnik anlaşılmazlıq və separatizm meyllərinin gücləndiyi bir dövrdə Azərbaycan öz təcrübəsi ilə sabit birgəyaşayış modelini ortaya qoydu.
Niyaz Niftiyev: "Azərbaycanın həm Avropa, həm də İslam dəyərlərinə sadiqliyi ölkəmizin multikultural və tolerant dövlət statusunu rəsmiləşdirdi"
Üçüncüsü, Azərbaycanın həm Avropa, həm də İslam dəyərlərinə sadiqliyi ölkəmizin multikultural və tolerant dövlət statusunu rəsmiləşdirdi. Beləliklə, Azərbaycana maraq, onun təqdim etdiyi multikultural və tolerant təcrübəyə beynəlxalq dəstək gəlməyə başladı. Ötən müddət ərzində Bakının ev sahibliyi etdiyi tədbirlərin beynəlxalq tərəfdaşlarının sayı genişləndi. BMT-nin Sivilizasiyalar Alyansı, Avropa Şurası, Avropa Şurasının Şimal-Cənub Mərkəzi, İSESCO, UNESCO, BMT-nin Dünya Turizm Təşkilatı kimi beynəlxalq qurumlar artıq Bakıda keçirilən tədbirlərin tərəfdaşları kimi çıxış etdilər. Belə olan təqdirdə Azərbaycan dövlətinin qlobal müstəvidə dinlərarası dialoqun inkişafına verdiyi töhfənin əhəmiyyəti daha böyük oldu. Cənab Prezidentin də Sammitdə çıxışında qeyd etdiyi kimi, Dünya dini liderlərinin II Bakı Sammiti onun bilavasitə təşəbbüsü ilə başlanan və həyata keçirilən “Bakı Prosesi”, “Multikulturalizm ili” və ən nəhayət “İslam Həmrəyliyi İli” çərçivəsində təşkil olunmuş beynəlxalq tədbirlərin davamıdır. Bu silsiləyə Bakıda hər iki ildən bir keçirilən Mədəniyyətlərarası Dialoq Forumunu da əlavə etsək millət və dövlət olaraq əldə etdiyimiz beynəlxalq dəstəyin əhatə dairəsinin daha geniş olduğunu görə bilirik.”
Kənan Novruzov
