"Təəssüf ki, son illər ərzində Azərbaycan ali məktəblərinə qəbul olmaq üçün sənəd təqdim edən abituriyentlərin sayı kəskin şəkildə aşağı düşüb. Belə ki, 2010-cu ildə ali təhsil almaq üçün müraciət edən şəxslərin sayı 110 min idisə, 2017-ci ildə bu rəqəm 70 minə yaxın oldu".
Bu barədə "Sherg.az"a təhsil üzrə ekspert Kamran Əsədov bildirib.
O qeyd edib ki, plan yerlərinin sayı isə əksinə olaraq, kəskin şəkildə artıb:
"2010-cu ildə ali məktəblərə ayrılan plan yerlərinin sayı 29 min idisə, 2017-ci ildə bu rəqəm 43 min oldu. Yəni tələbələrin sayının artması heçdə təhsilin inkişafı ilə əlaqədar deyil. Bundan başqa, bu il qəbul imtahanlarında 0-100 bal arası nəticə göstərənlərin sayı artıb. 2017-ci ildə qəbul imtahanlarında0-100 bal arası nəticə göstərənlərin arasında da müəyyən fərq müşahidə olunub. Ötən il 0-100 bal arası nəticə göstərənlərin sayı 11 030 nəfər idisə, bu il 11 999 nəfər belə nəticə göstərib. Bu il ali məktəblərə qəbul imtahanların 2 dəfə keçirilməsi bizə zəmin verirdi ki, nəticələrin ümumi tendensiyasında yaxşılaşma olacaq. Çünki birinci imtahandan sonra çox aşağı nəticə göstərənlər ikinci imtahana yazılmadılar.
Yaxşı, hətta əla nəticə göstərənlər isə öz zəif və güclü nəticələrini görüb ikinci imtahan daha hazırlıqlı gələrək daha yaxşı bilik nümayiş etdirdilər. İmtahanların nəticələrinə əsasən deyə bilərik ki, I qrupda orta bal 2,6 bal (1,15%) artıb. II qrupda abituriyentlərin sayı azalıb və orta bal 11 bal (-4,16%) aşağı düşüb. III qrupda abituriyentlərin sayı 797 nəfər artıb və orta bal 6,67 bal (0,01%) artıb. V qrupda da ötən illə bu ilin arasında 12 bal (3.74) artım var. Ümumi bütün qruplar üzrə nəticələri götürsək, görürük ki, orta bal -1 bal (0,4%) aşağı düşüb. Ümumilikdə nəticələr onu deməyə əsas verir ki, bu il bakalavr pilləsində imtahan verən məzunların nəticələri ötən illə təxminən eyni səviyyədədir".
Ayyət ƏHMƏD
