Azərbaycan Aşıqlar Birliyi İdarə Heyətinin mətbuata qapalı şəkildə keçirilən iclasında qurumun yeni sədri müəyyən edilib. Mərhum şair Zəlimxan Yaqubun dünyasını dəyişməsindən sonra Aşıqlar Birliyinə sədr vəzifəsinə Məhərrəm Qasımlı seçilib.
2008-ci ildən Azərbaycan Aşıqlar Birliyinin I katibi vəzifəsini icra edən Məhərrəm Qasımlı 1958-ci ildə Tovuz rayonunun Alakol kəndində anadan olub. Azərbaycan Dövlət Universitetinin filologiya ixtisasını bitirib.
1992-ci ildən Azərbaycan Milli Elmlər Akademiyasının (AMEA) Ədəbiyyat institutunda elmi işlər üzrə direktor müavini təyin olunan sədr 1994-cü ildən "Azərbaycan ədəbiyyatı tarixi” oncildliyi hazırlayanlardandır. 1996-2002-ci illərdə institutun "Xaricdə Azərbaycan Ədəbiyyatı”, 2002-ci ildən "Şifahi xalq ədəbiyyatı” şöbəsinə rəhbərlik edir. 2003-cü ildən nəşr olunan "Folklor və etnoqrafiya” jurnalının baş redaktorudur.
M.Qasımlı 2008-ci ildə "Novruz” ensiklopediyasını hazırlayıb və onun elmi redaktorudur. 2010-cu ildə Türkiyədə "Ozan-aşık sanatı” adlı kitabı çap olunub. Aşıqlar Birliyinin yeni sədri Orxan Paşa təxəllüsü ilə şeirlər də yazır. "Sənə sözüm var” adlı kitabı 2004-cü ildə çap olunub.
"Şərq”ə açıqlamasında Məhərrəm Qasımlının Aşıqlar Birliyinə sədr seçilməsini alqışladığını deyən millət vəkili, akademik Nizami Cəfərov yeni sədrə fəaliyyətində uğurlar arzulayıb: "Məhərrəm Qasımlı aşıq ədəbiyyatını dərin bilən böyük ziyalılarımızdan biridir. Mərhum
şairimiz Zəlimxan Yaqubun sədrliyi dövründə o, müavin vəzifəsini icra edirdi və düşünürəm ki, idarəçilik sirlərini də böyük şairdən məharətlə mənimsəyib. Bundan sonra da Birliyin yeni fəaliyyətlərində daha müsbət dəyişikliklər olacağını gözləyirəm”.
Azərbaycan Aşıqlar Birliyinin əsasını Hüseyn Arifin qoyduğunu xatırladan N.Cəfərov Zəlimxan Yaqubun fəaliyyəti dövründə qurumun kifayət qədər yüksək səviyyəyə qalxaraq, önəmli işlərə imza atdığını vurğulayıb: "Artıq 3-cü mərhələ Məhərrəm Qasımlı ilə başlayır və bu mərhələnin də özünəməxsus uğurla davam edəcəyini əminliklə deyə bilərəm”.
Aysel Aslan
