"Azərbaycan Hava Yolları” Qapalı Səhmdar Cəmiyyəti Bakıdan uçan sərnişinlərə uçuş vaxtına 3 saat qalmış qeydiyyat masalarına yaxınlaşmağı tövsiyə edib. AZAL bunu yay tətili mövsümünün başlanması və yüklənmənin artması, həmçinin təhlükəsizlik tədbirlərinin gücləndirilməsi ilə əlaqələndirib. Son günlər dünyada və yaxın qonşularımızda baş vermiş terror hadisələri diqqətə alınarsa, AZAL-ın təhlükəsizlik tədbirlərini gücləndirməsi tamamilə başadüşüləndir və təqdir olunasıdır.
Amma işin problemli tərəfləri də var. Təyyarə xidmətlərindən ömründə bircə dəfə də olsa istifadə etmiş şəxs bilir ki, uçuşlar adətən gecikir. Bəzən saatlarla. Sərnişinlər hava limanının yolunu nəzərə alıb onsuz da evdən bir-iki saat əvvəl çıxırlar. AZAL sərnişinlərə uçuş vaxtından 3 saat əvvəl gəlməyi tövsiyə edirsə, deməli, azı 6 saatın hava limanına həsr olunacağını gözardı etməlisən. Bütün bunlara tab gətirmək olardı, yenə də bəzi problemli məqamlar ortaya çıxmasaydı. Məsələn, əlində uçuş bileti olanların pasport və biletlərinin beynəlxalq terminalın çölündə yoxlanması kimi. Hazırda havaların isti keçməsi nəzərə alınarsa, sərnişinlər günün altında saatlarla dayanmalı olurlar və bu da təbii narazılıqlar yaradır. Bundan başqa, qohum-əqrəbasını, yaxınını qarşılamağa, yaxud yola salmağa gələnlərin terminalın ərazisinə daxil olmasının yasaqlanması da insanları narazı salır.
AZAL-ın sabiq prezidenti Ədalət Əliyev "Şərq”ə açıqlamasında "Azərbaycan Hava Yolları” QSC-nin təhlükəsizlik tədbirlərini gücləndirməsini vacib addım saydığını dedi:
- Hazırda bütün dünya ölkələri mümkün təhlükələrin önlənməsinə çalışır. Bu baxımdan AZAL təhlükəsizlik üçün hansı addımı atırsa, düzgündür. Hazırkı şərait faktiki fövqəladə vəziyyət hesab edilir. Ona görə sərnişinlər uçuşdan 3 saat əvvəl hava limanına gəlmək tələbini anlayışla qarşılamalıdırlar, çünki bu, ilk növbədə məhz onların təhlükəsizliyi baxımından atılan addımdır. Əvvəllər qeydiyyat keçmək müddəti 2 saat idi. İndi 3 saatadək artırıblar. Burada, narahatlıq doğuran bir iş olmamalıdır. Amma Türkiyədə hələ də 2 saat intervalı saxlanılır. Doğrudur, Heydər Əliyev adına Beynəlxalq Hava Limanında hər cür müasir avadanlıqlar, yoxlama qurğuları var. Ancaq bu da mümkündür ki, sıxlıq zamanı yerli personal sərnişinlərə, yüklərə baxış keçirilməsini 100 faiz çatdıra bilməsin. Qurğulara, avadanlıqlara da insanlar nəzarət edir. İnsan faktoru nəzərdən qaçmamalıdır. Amma hava limanının əməkdaşları hazırkı şəraitdə xüsusilə səbrli, nəzakətli olmalıdırlar ki, sərnişinləri razı salsınlar.
Ə.Əliyev bildirdi ki, təhlükəsizlik tədbirlərinin gücləndirilməsi digər məsələlərə də diqqət ayrılmasını tələb edir:
- Əgər sərnişinlərin terminalın ərazisinə daxil olması sənədlərinin yoxlanması səbəbindən ləngiyirsə, bu halda orada kölgəlik yaradılmalıdır, çətirlər quraşdırılmalıdır ki, insanlar gəlib günün altında dayanmasın. Gələnləri qarşılayanlar, yola salanlar üçün də ayrıca yerlər təşkil etmək lazımdır, havanın istisində kimsə su içə, əyləşə bilsin. Yəni, tədbirlər görülürsə, kompleks yanaşma olmalıdır. İnsanlara şərait yaradılmalıdır ki, hava limanının xidmətlərindən sərbəst istifadə etsinlər.
Məlahət Rzayeva
