Göyçay rayonunda güllələnmə hadisəsi baş verib. Rayonun Polis İdarəsindən ANS PRESS-ə verilən məlumata görə, Alıkənd kənd sakini 1966-cı il təvəllüdlü Raqif Məmmədov münaqişə zəminində ov tüfəngindən açdığı atəşlə həmkəndlisi 1986-cı il təvəllüdlü Nurlan Məmmədova xəsarət yetirib və hadisə yerini tərk edib. Güllə yarası alan 30 yaşlı N. Məmmədov dərhal rayon mərkəzi xəstəxanasına çatdırılıb və edilən tibbi yardımlar nəticəsində onun həyatını xilas etmək mümkün olub.
Göyçay rayon polis şöbəsi əməkdaşlarının həyata keçirdikləri əməliyyat-axtarış tədbirləri nəticəsində hadisəni törədən R.Məmmədov tutulub və hadisə törədilərkən istifadə edilən müvafiq sənədi olmayan İJ-17 markalı ov tüfəngi götürülüb.
Onların arasındakı mübahisə otlaq sahəsindəki otun biçimi ilə bağlı yaranıb.
Faktla bağlı Göyçayda cinayət işi açılıb, araşdırma aparılır.
Bənzər hadisə bir müddət əvvəl Ağdaş rayonunda da qeydə alınıb. Rayonun Hacılı kəndində kənd sakini, 1999-cu il təvəllüdlü Emin Zəkəriyyə oğlu Həsənov atasına məxsus ov tüfəngindən atəş açaraq qohumu 1993-cü il təvəllüdlü Pünhan Sadiq oğlu Həsənovu güllələyib.
Hadisənin ehtiyatsızlıq səbəbindən baş verdiyi bildirilirdi.
Ağdaş RPŞ əməkdaşları tərəfindən E.Həsənovdan "TOZ-16” markalı ov tüfəngi götürülüb.
