Niyə şovinist ukraynalıların millətçi damarı digər xalqlardan, məsələn, erməni və gürcü millətindən olan ticarətçilərə, iş adamlarına, diasporaya qarşı qabarmır?
Ukraynanın paytaxtı Kiyevdə, Taras Şevçenko meydanı yaxınlığında yerləşən bazarda özlərini "terror əleyhinə əməliyyatın iştirakçıları” adlandıran şəxslər azərbaycanlılara atəş açıblar. Bu barədə "Facebook” sosial şəbəkəsində "Kiyev Operativnı” səhifəsində məlumat yayılıb. Məlumatda deyilib ki, Taras Şevçenko meydanı yaxınlığında yerləşən bazara naməlum şəxslər gəlib. Onlar özlərini "ATO döyüşçüləri” kimi təqdim ediblər. Bir müddət sonra satıcılarla münaqişə yaranıb.
Münaqişə nəticəsində "ATO döyüşçüləri” satıcılara bir neçə dəfə atəş açıblar. Nəticədə soydaşlarımız ciddi xəsarət alaraq xəstəxanaya yerləşdiriliblər. Bu, azərbaycanlılara qarşı baş verən yeganə təzyiq olmayıb. Həmin günü digər toqquşma Nikolayev şəhərinin mərkəzində, Sobornaya və Admiralskaya küçələrinin kəsişməsində baş verib. Atışma nəticəsində azərbaycanlılar zərər çəkiblər. Polisdən bildirilib ki, üç nəfər xəstəxanaya gətirilsə də, onlardan birinin həyatını xilas etmək mümkün olmayıb. İnsidentlərin araşdırıldığı deyilib.
Məsələ ilə bağlı "Şərq”ə danışan İctimai Tədqiqatlar Mərkəzinin rəhbəri, kriminalist İlqar Altay deyib ki, əgər siyasi tərəfi istisna etsək, burada iki məsələni vurğulamaq mümkündür:
"Birinci məqam xərac-pul məsələsidir. Burada iki variant mövcuddur. Kriminal sfera tərəfindən edilən təhdid və təzyiq bütün postsovet məkanında mövcuddur. Digər tərəfdən Ukraynada kriminal-qoçu tipli hərbi birləşmələr var. Məsələn, "ATO” deyilən qurum onlardan biridir. İkinci məsələ isə sırf millətçilik ruhunda baş verən sıxışdırmalar ola bilər. Bu tendensiya da Ukraynada çox güclü yayılıb. Sadəcə problem ondadır ki, niyə şovinist ukraynalıların millətçi damarı digər xalqlardan, məsələn, erməni və gürcü millətindən olan ticarətçilərə, iş adamlarına, diasporaya qarşı qabarmır?
Niyə sadəcə azərbaycanlılara qarşı mütəmadi və getdikcə daha da qəddarlaşan, ölüm səviyyəsinə çatan prosesləri müşahidə edirik? İstər-istəməz bu cür silsilə hadisələr Ukraynada Azərbaycana və azərbaycanlılara qarşı xüsusi qərəzli münasibət düşüncəsi yaradır. Fikrimcə, bu proseslərin mənbəyi çox güclü və Azərbaycana nifrət edən dairələrə, o cümlədən Ukraynanın erməni daxili işlər naziri Arsen Avakova gedib çıxır. Xüsusən, Ukraynadakı azərbaycanlılara qarşı bu cür qanunsuz basqıların qarşısının alınmasının və günahkarların cəzalandırılmasının "müşkülə” düşməsi birbaşa DİN və Avakovla bağlıdır”.
İsmayıl
