"Bu gün Ermənistanda İrəvan meri seçkiləri keçirilir. Bu seçkilərdə əsas rəqabətin "Tsarukyan” fraksiyasının deputatı və "Çiçəklənən Ermənistan” partiyasının İrəvan meri vəzifəsinə namizəd olan Naira Zöhrabyan ilə "Mənim addımım" blokunun namizədi olan Hayk Marutyunyan arasında keçəcəyi ehtimal olunur".
Bunu "Sherg.az"a analitik Ehtiram Aşırlı bildirib. Analitik Naira Zöhrabyanın bu seçkilərdə qalib gəlmə ehtimalı yüksək dəyərləndirir:
"O, hazırda Ermənistanda çox populyar qadın deputat olaraq tanınır. Ölkədəki reytinqinə görə, Ermənistan baş naziri Nikol Paşinyanın həyat yoldaşı Anna Akopyanı da geridə qoyub.
Bundan əlavə, N.Zöhrabyan post-patrul alayının binasını tutan və keçmiş hakimiyyətə qarşı mübarizə aparan "Sasna Tsrer” silahlı qruplaşmasının üzvlərinin azadlığa buraxılması uğrunda aktiv mübarizə aparıb.
O, həmçinin sadə insanların tullantıların toplanmasından sosial problemlərinədək mövcud çətinliklərinin həlli istiqamətində də aktivlik göstərib.
Son olaraq, onun Hayk Marutyunyanın bu seçkiləri "ağ" və "qara"ların mübarizəsi olacaq fikrini ilk tənqid edənlərdən biri olması erməni cəmiyyətində nüfuzunun daha da artmasına gətirib çıxardığını söyləyə bilərik.
Digər tərəfdən, rəqibinə nisbətən N.Zöhrabyan siyasət baxımından daha təcrübəlidir. Hazırda deputat kimi fəaliyyət göstərməsi də onun üstünlüyü deməkdir.
Ondan fərqli olaraq rəqibi Hayk Marutyunyanın siyasi təcrübəsi demək olar ki, yox dərəcəsindədir. Lakin onun seçkilərdəki üstünlüyü "məxməri inqilabı"nı qələbə ilə başa vuran və hazırda Ermənistan baş naziri olan Nikol Paşinyanın ona dəstək verərək seçki kampaniyalarında çıxış etməsidir.
Bu da öz növbəsində N.Paşinyanı dəstəkləyənlərin H.Marutyunyana səs verəcəyi deməkdir. H.Marutyunyanın başqa bir üstünlüyü isə Ermənistanda tanınmış aktyordur ki, bu da onun müəyyən bir tamaşaçı kütləsinə sahib olmasından xəbər verir.
Yuxarıda bəhs etdiyimiz səbəbləri nəzərə alsaq, görərik ki, N.Zöhrabyanın bu seçkilərdə qalib gəlməsi ehtimalı rəqibinə nisbətən yüksək olduğu görünür.
Ermənistan Respublikaçılar partiyasının bu seçkilərdə namizəd irəli sürməmələri də qeyd olunması lazım olan vacib bir məqamdır. Lakin namizəd irəli sürməsələr də bu seçkilərdə Respublikaçılar partiyasının dəstəyinin "Çiçəklənən Ermənistan” partiyasının İrəvan meri vəzifəsinə namizəd olan N. Zöhrabyandan yana olacağını ehtimal etmək olar. Əvvəla onu qeyd edim ki, bu yaxınlarda erməni iş adamı Qaqik Tsarukyan ilə eks-prezident Serj Sarkisyan arasında baş tutan görüşdə Respublikaçılar partiyasının N.Zöhrabyanı dəstəkləmələri barədə gizli bir razılığa gəlmələri ehtimalının yüksək olmasından xəbər verir.
Bir sözlə, bu seçkilərdə Çiçəklənən Ermənistan” partiyasının İrəvan meri vəzifəsinə namizəd olan N.Zöhrabyanın qalib gələcəyini ehtimal edirəm. Əks halda isə H.Marutyunyan çox cüzi fərqlə qalib gələcəyini söyləyə bilərik".
Ayyət Əhməd
