"Prezident İlham Əliyevin "Rossiya-24” telekanalına müsahibəsində münaqişənin həlli ilə bağlı dedikləri çox dəqiqliklə söylənilmiş ifadələrdir”.
Bunu "Sherg.az”a açıqlamasında millət vəkili Asim Mollazadə deyib.
Deputat bildirib ki, Ermənistanın özünü xilas etməsinin sadəcə bir yolu var:
"İrəvan hökuməti Dağlıq Qarabağ münaqişəsinin sülh yolu ilə həlli istiqamətində ciddi danışıqlar aparmalı, real addımlar atmalıdır. Əks halda Ermənistan müstəqilliyini və dövlətçiliyini itirmiş bir hərbi əraziyə çevriləcək.
Mənə elə gəlir ki, artıq Ermənistanın yeni hakimiyyəti çox ciddi düşünməlidir. Əgər onlar inkişafa nail olmaq istəyirlərsə, normal bir dövlət olmağı düşünürlərsə, mütləq mənada sülhə getməli, torpaqları qaytarmalıdır”.
Qeyd edək ki, Prezident İlham Əliyev "Rossiya-24” telekanalına müsahibəsində deyib ki, "biz münaqişəni həmişə danışıqlar yolu ilə nizamlamaq istəmişik və istəyirik. Lakin təbii ki, danışıqlar yolu ilə nizamlamaq üçün çox ciddi vasitələr lazımdır”. Dövlət başçısının sözlərinə görə, aparılan siyasət sülhün regiona hansı üstünlüklər verəcəyini və sülh olmayacağı təqdirdə Ermənistanda hansı çətinliklər yaranacağını göstərməyə yönəlib: "Mən qəti əminəm ki, Ermənistanın yeni rəhbərliyinin ölkəni dəyişmək üzrə bütün planlarını həyata keçirməsi üçün yeganə yol Azərbaycanla münaqişənin nizamlanması yoludur. Bunun üçün isə onlar özlərinə məxsus olmayan ərazilərdən çıxmalı və yüz minlərlə azərbaycanlının öz yurdlarına qayıtmasına imkan verməlidirlər. Buna görə də ümid var ki, bu baxımdan daha çox anlaşma olacaq. Amma dəqiq deyə bilmərəm. Necə deyərlər, vaxt göstərər. Amma biz də haqqında dediyim siyasəti ardıcıl olaraq yürüdəcəyik, xüsusən görəndə ki, o, nəticə verir”.
İsmayıl
