Ötən həftə Fransanın "Le Figaro" qəzeti bu ilin noyabrın 1-dən dünya bazarında qazın qiymətinin 5,4 faiz bahalaşacağını yazıb.
Məqalədə qeyd olunur ki, bu artım 2018-ci ilin yanvarından etibarən baş verən 3-cü ən böyük bahalaşmadır. Bundan başqa xəbərdə bildirilir ki, yanvar ayında qazın qiymətində 6,9 faiz, iyul ayında 7,4 nisbətində yüksəlmə olub. Noyabr ayında olacaq 5,4 faizlik bahalaşmanı nəzərə alsaq, 2018-ci ildə bu qiymət artımı 20 faizə yaxınlaşacaq. Bu bahalaşmanın səbəbi isə havaların soyuması nəticəsində qaza olan tələbatın artması və dünyakı geopolitik proseslərlə izah olunur.
Fransa mətbuatının bahalaşma ilə bağlı iddiasının nə dərəcədə real olub olmamasını öyrənmək üçün Neft Araşdırmalar Fondunun rəhbəri İlham Şabanla əlaqə saxladıq. Mərkəz rəhbəri "Sherg.az”a söylədi ki, indiki halda qazın qiymətinin artması adi haldır:
"Fransa mətbuatının dünya bazarında qazın qiymətinin qalxmasına səbəblərdən biri kimi havanın soyumasını göstərməsi nisbətən məntiqlidir. Amma qiymət artımına geopolitikanın təsir edəcəyi fonunda olan məlumat heç cür ağlabatan deyil. Çünki neftdən fərqli olaraq qazın qiymətinin siyasətlə hər hansısa bir mütənasibliyi yoxdur. Neft birjalarda dəyərləndiyi üçün onun qiyməti tez-tez dəyişir. Düzdür, qazın qiyməti neftlə bağlı olsa da, amma bu proses özünü altı aydan sonra göstərir. Lakin söhbət birjada satılan qazdan gedirsə, onun qiyməti tələb və təklifdən aslı olaraq dəyişir.
Ona görə də, qış mövsümündə insanlar qazdan çox istifadə etdiyi üçün onun dəyərinin artması və ya əksinə ilin isti dövrdə təlabatın azalması ilə qiymətin enməsi normalı haldır. Hazırda Avropada qazının qiyməti 250- 260 dollardırsa, bu trend Yaxın və Orta Şərq bazarlarında 350-360 dollar civarındadır. Yəni qiymətlər coğrafi ərazilər üzrə də dəyişə bilir”
Kənan Eynuroğlu
