Gürcüstan Prezidenti Salome Zurabişvili müşavirləri və komandasının bəzi üzvlərini təqdim edib. Prezident Administrasiyasının rəhbəri Laşa Jvania təyin olub. Administrasiyanın rəhbər müavini isə Ketevan Maxaraşvili olacaq. O, həmçinin Gürcüstan Prezidentinin milli azlıqlar və gender bərabərliyi ilə bağlı fəaliyyətini də koordinasiya edəcək. K.Maxaraşvili müvəqqəti olaraq mətbuat katibi vəzifəsini də icra edəcək. Prezidentin parlament üzrə katibi Dmitri Qabunia, məhdud imkanlı şəxslərin işi üzrə müşaviri Simon Petridis, diaspor və vətəndaşlıq üzrə müşaviri Natia Sulava təyin olunub. Dövlət başçısı həmçinin hərbi məsələlər, ictimaiyyətlə əlaqələr, mədəniyyət, təhsil və elm sahələri üzrə də müşavirlərini təqdim edib.
Bu günə qədərki müşavirlərin soydaşlarımıza olan münasibəti ilə bağlı "Şərq”ə danışan "Borçalı" Cəmiyyətinin sədri Zəlimxan Məmmədli bildirib ki, soydaşlarımızın Gürcüstanın ictimai-siyasi həyatında iştirakı artan xətt üzrə getməkdədir:
"Gürcüstanda demokratik islahatlar gedir. Müəyyən geriləmələr və irəliləyişlər var. Amma bu gün ixtiyar hüquqla soydaşlarımızın əlindədir. Onlar siyasi hakimiyyətin qurulmasında nə qədər fəal olarsa, hakimiyyətin idarə olunmasında da bir o qədər iddialı ola bilərlər. Təbii ki, soydaşlarımızın fəallığı ilə bağlı gözəl və reallığa uyğun nəticələr gələcəyin işidir. Hər halda milli azlıqlarla müşavir postunda say tərkibinə görə iddialılarından biri borçalı türkləridir və belə də olmalıdır. Düşünürəm ki, soydaşlarımızın müvafiq strukturlarda olması indiki zamanda daha real görünür”.
Yeganə Bayramova
