Baytarlıq Xidməti Azərbaycanda "donuz qripi" təhlükəsinin olmadığını açıqladı
Qonşu ölkədə yayılan xəstəliklə bağlı ölkəmizdə nə kimi tədbirlər görülür? "Donuz qripi" Gürcüstandan ölkəmizə keçə bilərmi?
Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli "Şərq”ə açıqlamasında bildirib ki, hazırda ölkəmizdə "donuz qripi" ilə bağlı epizodik durum qeydə alınmayıb. Onun sözlərinə görə, Azərbaycanda yerləşən donuzçuluq komplekslərinə daim nəzarət olunur:
"Məlumdur ki, "donuz qripi" yüksək gedişli xəstəlikdir və ilin əsasən soyuq aylarında müşahidə edilir. İnsanda hərarətin yüksəlməsi, ümumi zəiflik, yuxarı tənəffüs yollarının, gözün selikli qişasının, həmçinin ağciyərin iltihabı ilə səciyyələnir.
Bu xəstəlik A qripinin H1N1 növünə aiddir. Virus antigenik xüsusiyyətə malikdir. 60 dərəcə temperaturda 20 dəqiqəyə, 100 dərəcə temperaturda isə ani olaraq məhv olur. Qripə cinsindən və yaşından asılı olmayaraq bütün donuzlar, eyni zamanda insanlar yoluxa bilər. İnfeksiya törədicisinin mənbəyi isə xəstə donuzlar hesab edilir. Onlar virusu burun axıntısı, öskürmək, asqırmaq, bəzən də nəcis təsbiti ilə xaricə ifraz edirlər”.
DBX-nin mətbuat katibi bildirib ki, virus əsasən hava-damcı yolu ilə yoluxur və ilin soyuq, nəmli hava şəraitində xəstəliyin yoluxmasına münbit şərait yaranır:
"Adətən sanitariya qaydalarına əməl edilmədikdə bu xəstəlik yüz faiz yoluxmaya gətirib çıxarır, ölüm halları isə adətən 30-60 faiz təşkil edir. "Donuz qripi" xüsusilə insanlar üçün çox təhlükəlidir. İnsanlar bu virusa donuzlarla təmas zamanı yoluxurlar. Həmçinin virus insandan insana da keçə bilir. Orqanizmə daxil olan virus əsasən tənəffüs orqanlarının selikli qişalarında özünə yer tapır. Ümumiyyətlə, heyvanlarda "donuz qripi"nin spesifik müalicəsi yoxdur”.
Y.Xanvəlinin sözlərinə görə, ölkəmizdə hələlik donuzlar arasında heç bir xəstəlik daşıyıcısı qeydə alınmayıb:
"Mütəmadi olaraq ölkəmizdəki donuzçuluq komplekslərinə baş çəkirik və müvafiq monitorinqlər aparırıq. Epizodik tədbirlər planlarına uyğun öz tədbirlərimizi də həyata keçirmişik. Həmçinin donuzların qara yara və Afrika tanununa görə peyvəndləmə tədbirləri yüksək səviyyədə yerinə yetirilib.
Ölkəmizdə heyvanlar arasında "donuz qripi" və digər yoluxucu xəstəliklərə görə epizodik vəziyyət sabitdir. 2008-ci ildə ölkəmizdə Qəbələ rayonunun Nic kəndində bütün təsərrüfatların qapalı şəraitə keçirilməsinə göstəriş verildi. O gündən bəri bütün donuzçuluq təsərrüfatları qeydiyyatdadır. Ölkəmizdə o qədər də böyük donuzçuluq kompleksləri yoxdur, təxminən 7 min baş donuz saxlanılır. Bu da əsasən Gədəbəy, Abşeron yarımadası, Qars, Qəbələ və İsmayıllı rayonlarındadır”.
Yeganə Bayramova
