"İrəvan isə tədricən ümidlənir"
"Azərbaycan isə qətiyyətli olmalıdır. Biz öz ərazimizdə ikinci erməni dövlətinin yaradılmasına icazə verə bilmərik”
"Proseslər belə davam etsə, Azərbaycan növbəti mərhələdə Qərbi Zəngəzura ərazi iddiasını ortaya qoyacaq”
Prezident İlham Əliyev Xocasən qəsəbəsində şəhid ailələri və müharibə əlillərinə mənzillərin və avtomobillərin təqdim edilməsi mərasimindəki çıxışı zamanı bir çox mühüm məqamlara toxunub. O, bilirib ki, biz Ermənistanla sülh müqaviləsini imzalamağa hazırıq. Ancaq Ermənistan tərəfindən buna reaksiya yoxdur. Qeyri-rəsmi kanallarla bizə çatan məlumata görə, Ermənistan buna hazır deyil.
“Onu da bildirməliyəm ki, delimitasiya işləri ilə bağlı indi beynəlxalq təşkilatlar da müsbət reaksiya verirlər. Əgər Ermənistan bunu etmək istəmirsə, özü bilər, ancaq yaxşı fikirləşsinlər, sonra gec ola bilər. Necə ki, vaxtilə əgər öz xoşları ilə bizim torpaqlarımızdan çıxsaydılar, bu qədər rəzil duruma düşməzdilər. Bizim bu təklifimiz qalib ölkənin təklifidir, güclü tərəfin təklifidir, müzəffər xalqın təklifidir. Əgər buna Ermənistanda mənfi reaksiya varsa, bunu da özləri bilərlər. Amma yenə də deyirəm, yenə də peşman olacaqlar. Biz isə bundan sonra ancaq və ancaq irəli gedəcəyik”. – deyə, dövlət başçısı əlavə edib.
Millət vəkili, MCP sədri Razi Nurullayev “Sherg.az”a açıqlamasında düşmənin hələlik buna hazır olmadığını bildirdi: “Proseslər göstərir ki, Ermənistan yekun sülh müqaviləsini imzalamaqda könüllü deyil. Çünki bizim üçün ölü quruma çevrilən Minsk Qrupu düşmənin “əlinə oynayır”. İrəvan isə tədricən ümidlənir. Görünür, həmsədrlər problemin mövcud reallıqlara uyğun həllində maraqlı deyillər. Azərbaycan isə qətiyyətli olmalıdır. Biz öz ərazimizdə ikinci erməni dövlətinin yaradılmasına icazə verə bilmərik”.
R.Nurullayev, həmçinin çıxış yolunu da göstərdi:
“Rəsmi Bakı bütün lazımi addımları atır. Qarabağ və Şərqi Zəngəzur iqtisadi zonalarının yaradılması olduqca təqdirəlayiqdir. Deməli, Qərbi Zəngəzur da var. Biz Qərbə, düşmənə mesaj veririk ki, Ermənistan yekun sülh müqaviləsini imzalayıb ərazi bütövlüyümüzü tanımasa, Qərbi Zəngəzur məsələsini gündəmə gətirəcəyik. Onlar bizim ərazi bütövlüyümüzü tanımırsa, biz də onlarınkını tanımayacağıq. Hərçənd ora da bizim tarixi torpaqlarımızdır. Fikrimcə, proseslər belə davam etsə, Azərbaycan növbəti mərhələdə Qərbi Zəngəzura ərazi iddiasını ortaya qoyacaq”.
