Qəbul imtahanlarında yüksək nəticə göstərib pedaqoji ixtisası seçənlərin sayı hər zaman az olurdu. Lakin son illərdə müəllimlik peşəsinə olan maraq çoxalıb. Artıq 500-dən yuxarı bal toplayan şagirdlərin pedaqoji ixtisası seçməsinin şahidi oluruq.
Son zamanlar müəllimlərin diaqnostik qiymətləndirməsi və əmək haqlarında artımların müşahidəsi, görünür, müəllimlik peşəsinə olan marağı artırıb. Bəs, ekspertlər bu barədə nə düşünür? Pedaqoji ixtisasa olan marağın artma səbəbi maaşların artmasıdır, yoxsa burda başqa amillər rol oynayır?
Mövzu ətrafında fikirlərini "Şərq"lə bölüşən ekspertlər müəllimlik peşəsinə olan marağın artan tendensiya üzrə olduğunu təsdiqlədilər. Təhsil üzrə ekspert Nabatəli Qulamoğlunun fikrincə, diaqnostik qiymətləndirmədən sonra müəllimlərin maaşında o qədər də ciddi artımlar yoxdur:
"Dəfələrlə demişik ki, diaqnostik qiymətləndirmədən sonrakı maaş müəllimlərin normal maaşıdır.
Yəni, bu sahədə müəyyən monipulyasiya mövcud idi və qiymətləndirmədən sonra dərs sayı artdı, beləliklə müəllimlər saatlara uyğun olaraq məvacib aldılar. Maaşda yüngül miqdarda dəyişiklik var, lakin digər tərəfdən də inflyasiya o pulu "yeyir". Hazırda o məbləğ müəllimin gündəlik tələbatını ödəyirmi? Təbii ki, ödəmir, ona görə də hesab etmirəm ki, yüksək bal yığaraq müəllimlik peşəsini seçən tələbələr maaşın artması amilinə əsaslanaraq pedaqoji ixtisası seçirlər.
Hər birimiz görürük ki, valideynlər övladlarını məktəbə göndərmir, göndərirsə də sadəcə olaraq uşağın adını yazdırırlar. Onlar uşaqlarına fərdi müəllim tutur və ya müxtəlif kurslara yazdırırlar, beləliklə həmin uşaqlar yüksək bal toplayırlar. Bu zaman müəllimlik ixtisasının prestiji artmış olur. Elə müəllim tanıyıram ki, bir qrupda 32 şagirdlə məşğul olur və orta hesabla hər şagirddən 50 manat pul alırsa, ayda 1000-15000 manat pul qazanmış olur. Bütün bunları şagirdlər görür və dərk edir. Respublikadakı müəllimlərin demək olar ki, çoxunu tanıyıram, onlar bahalı maşın sürürlər, yəni bu, onların fərdi məşğulolma nəticəsində əldə etdiyi halal pul və maşındır. Düşünürəm ki, abituriyentləri pedaqoji sahəyə yönləndirən əsas səbəb odur ki, onlar yüksək balla hüquqşünaslıqda oxuyaraq "çirkli" pullar qazanıb korrupsiya ilə məşğul olmağı yox, halal pul qazanaraq müəllim işləməyi daha yüksək hesab edirlər".
Azad Müəllimlər Birliyinin sədri, təhsil eksperti Məlahət Mürşüdlü müəllimliyin müqəddəs bir peşə olduğunu bildirdi. Onun sözlərinə görə, əvvəllər bu ixtisasa aşağı balla qəbul olunurdusa, getdikcə 400, hətta 500-dən yuxarı balla müəllimlik ixtisasını seçənlər olur:
"Çox sevindirici haldır ki, bu tendensiya hər il artır. Son dövrlərdə həqiqətən müəllimlik peşəsinə maraq artıb. Müəllimlərin az da olsa əmək haqqının artırılması, digər tərəfdən iş tapmaqda mövcud olan neqativ halların aradan qaldırılması üçün tədbirlərin görülməsi şagirdləri bu sahəyə yönləndirdi. Məlumdur ki, müəllimlərin diaqnostik qiymətləndirməsi, sınaq imtahanları - bütün bunlar işə qəbuldakı mənfi halların aradan qalxmasına kömək oldu. Yəni ki, əlində diplomu olan müəllim rahatlıqla müsahibələrdən və sınaqlardan keçərək öz ixtisasına sahib ola bilir. Eyni zamanda müəllimlərin peşəkarlığının artırılması ilə bağlı proqramların həyata keçirilməsi, gənclərdə daimi iş yerinin olması ilə bağlı düşüncələrin olması da pedaqoji ixtisasa marağı artırdı".
Yeganə Bayramova
