Azərbaycan Prezidenti yanında Əfv Məsələləri Komissiyasının yeni tərkibdə ilk iclası keçirilib. Komissiyanın üzvü, "525-ci qəzet”in baş redaktoru Rəşad Məcidin sözlərinə görə, iclasda əfvlə bağlı müraciətlərə baxılıb.
Komissiyanın daha bir neçə iclasının keçirilməsinin nəzərdə tutulduğunu vurğulayan baş redaktor Novruz bayramı ərəfəsində Prezident İlham Əliyev tərəfindən Əfv sərəncamının imzalanacağına ümid etdiklərini də bildirib: "Komissiyaya əfvlə bağlı xeyli sayda müraciət daxil olub və araşdırılır. İlk iclasda sənədlərin bir hissəsinə baxdıq. Müraciətlər çox olduğu üçün Komissiya daha bir neçə dəfə toplaşacaq. Baxıldıqdan sonra müsbət rəydən keçən sənədlər əfv üçün ölkə başçısına təqdim olunur. Güman edirəm ki, Novruz bayramı münasibəti ilə Əfv fərmanı olacaq. Amma bu barədə Əfv Komissiyasının iclasları tam başa çatdıqdan sonra dəqiq fikir bildirmək mümkün olacaq”. Əfv Məsələləri Komissiyasının yeni tərkibdə ilk iclasının kifayət qədər maraqlı olduğunu vurğulayan R.Məcid deyib ki, Komissiya ilə bağlı təəssüratlarını iclaslar tam bitəndən sonra bildirəcək.
Müdafiə Təşkilatları Monitorinq Qrupunun üzvü, hüquq müdafiəçisi Səadət Bənənyarlı da Novruz bayramı ilə əlaqədar əfv gözlədiklərini bildirib. Hüquq müdafiəçisi bu dəfə Əfv sərəncamı imzalanacağı halda siyasi məhbus adlandırılanların azadlığa çıxacağını istisna etmir: "İnanırıq ki, martda əfv olacaq. Bizim gözləntilərimiz budur ki, budəfəki əfv daha çox məhbusa şamil edilsin. Mütəmadi olaraq bizə edilən müraciətlərlə bağlı aidiyyəti qurumu məlumatlandırırıq. Düzdür, Əfv Komissiyası bu işlə bağlı müntəzəm olaraq işləyir. Müraciətçilərin özləri də əfvlə əlaqədar müvafiq strukturlara müraciət edirlər. Biz də hüquq müdafiəçisi olaraq, həmin şəxslərin azadlığa buraxılmasını Komissiyadan xahiş edirik”.
S.Bənənyarlı əfv olarsa, ölkə başçısının siyasi məhbus sayılanları da nəzərə alacağına ümid edir: "Biz də istərdik ki, Prezident fərmanı imzalayarkən köhnədən qalan siyasi məhbus adlandırılan şəxslərin də adlarını ora əlavə etsin”. Əfv məsələsinin birbaşa Prezidentin humanistliyindən asılı olduğunu vurğulayan hüquq müdafiəçisi hər ehtimala ümidli olduqlarını deyib”.
Şəymən
