"ABŞ-dakı erməni lobbisinin təsir dairəsi Azərbaycanda düşünüldüyündən xeyli azdır”. Bunu ABŞ dövlət katibinin xüsusi müşaviri, postsovet məkanı üzrə ekspert Pol Qobl deyib. Ekspert bildirib ki, amerikalı ermənilər xeyli müddət Kaliforniya və Massaçusets ştatlarında ciddi nüfuza malik olublar, lakin indi vəziyyət mənfiyə doğru dəyişməkdədir: "Hazırda neft və Türkiyə ilə münasibətlərlə bağlı narahatlıq mövcuddur. Bu isə hər şeydən vacibdir”. Məlum olduğu kimi, erməni lobbisi ABŞ Senatının Erl Litsenberqerin səfir kimi irəli sürülməsinə də qarşı çıxıb. Buna baxmayaraq, Dövlət Departamenti Litsenberqerin namizədliyini təsdiqləyib. Bu məqamın özü ermənilərin əvvəlki təzyiq vasitələrini itirməsi, beynəlxalq dairələrdə dəstək görməməsi kimi dəyərləndirilir.
Məsələni "Şərq”ə təhlil edən politoloq Azər Rəşidoğlu deyib ki, Nikol Paşinyanın qeyri-müəyyən və etibarsız siyasəti İrəvana, o cümlədən erməni diasporasına olan etimadsızlığı daha da gücləndirib:
"İrəvan Qərbdə də, Rusiyada da önəmini itirməkdədir. Ermənistanın iqtisadi sahədə heç bir manevr imkanları yoxdur. Avropa Birliyinin Ermənistana ayırdığı milyonlarla vəsait Rusiyadan alınan qaza sərf edilərsə, Paşinyanın sosial islahatlar üçün ümid etdiyi maliyyənin səmərəliyi olmayacaq. Nəticədə xalq yenidən ağır sosial tələblərlə etiraz aksiyalarına çıxacaq. Baş verən proseslər göstərir ki, Paşinyanın islahat vədləri heç bir real əsaslara malik deyil. Qərb, Ermənistana maliyyə və siyasi dəstək naminə onun Rusiyanın orbitindən çıxması üçün vədlər verib. Kreml isə çalışır ki, Paşinyanın qərbpərəst siyasətinin qarşısını alsın. Bununla belə, Ermənistanda siyasi-iqtisadi vəziyyət gərgin olaraq qalmaqdadır.
Ümumiyyətlə bu ölkədə əsaslı islahatlar mümkün deyil. Ermənistana daha bir iqtisadi sanksiya xəbərdarlığı ABŞ-dan gəlib. Ermənistanda səfərdə olan ABŞ Dövlət katibinin Avropa və Avrasiya məsələləri üzrə köməkçisinin müavini Corc Kent bildirib ki, İranla ticarət məsələsində Ermənistana hər hansı güzəşt tətbiq edilməyəcək. Burada bir faktı xatırlatmaq yerinə düşər ki, bir müddət əvvəl İrana qarşı yeni sanksiyaların tətbiq edilməsi ilə bağlı Donald Trampın imzaladığı fərmanda Azərbaycanla bağlı bənd sənəddən çıxarılmışdı. Lakin Paşinyana qarşı Vaşinqton fərqli siyasət yürüdür. Əlbəttə, bu vəziyyət Azərbaycana sərf edir və Qarabağ münaqişəsinin tənzimlənməsində Bakını uduşlu duruma gətirir”.
İsmayıl
