"Piyadalar elə bilirlər ki, cərimə etməklə yol polisləri onlara böyük zərər vurur”.
Bunu "Sherg.az"-a Azərbaycan Texniki Universitetinin Avtomobil daşımaları və yol hərəkətinin təşkili kafedrasının dosenti, nəqliyyat eksperti Fərhad Eyyubov deyib. O bildirib ki, bu, əslində piyada üçün bir yaddaşdır:
"Piyada dərk etməlidir ki, yolu özünə təhlükəsizlik yaratmayacaq şəkildə keçsin. Ona görə, piyadalara yazılan cərimələrin lehinəyəm. Çünki piyadalar piyada vərdişlərinə əməl etmirlər. Xarici ölkələrə gedənlər insanlara qibtə edilər ki, onlar lazımı yerdə yolu keçir. Bizdə isə çox pis vəziyyət hökm sürür.
Dəfələrlə qeyd etmişəm ki, yol hərəkətini nizama salmaq üçün piyada könüllüləri yaratmaq lazımdır. Bunu yaratmaq kimin səlahiyyətində olacaqsa diqqətlə yanaşmalıdır.
Yolda piyada keçidi yoxdursa, məcbur deyilik özümüzü hərəkət edən maşının altına ataq. Bəzi yerlərdə yol ayırıcıları uzaq olsa da insan özünü təhlükəyə atmamalıdır.
Son zamanlarda nəqliyyat hadisələrində piyadalarla bağlı faktlar artıb. Yol nəqliyyat hadisələrində nəqliyyat vasitələrinin bir-biri toqquşması tədqiq olunsa da, nəqliyyat vasitələri ilə piyadaların vurulması halları dərindən analiz edilməyib. Çünki hər bir toqquşma insanın özünün böyük ziyanına səbəb olur. Ona görə, insanlar məsuliyyət hiss edib, öz həyatlarını təhlükəyə atmamalıdırlar”.
Aysel Aslan
