Azərbaycanda uzun müddətdir müzakirə edilən "Psixoloji yardım haqqında” qanun layihəsi artıq hazırdır.
Parlamentin Səhiyyə komitəsinin sədr müavini Musa Quliyev bildirib ki, qanun layihəsi Səhiyyə komitəsi tərəfindən hazırlanıb, müzakirələrdən keçib, müxtəlif əlaqədar nazirliklərdən, dövlət komitələrindən müsbət rəylər alınıb, aidiyyəti üzrə qeyri-hökumət təşkilatları, müxtəlif psixoloji mərkəzlərdə çalışan psixoloqlar qanun layihəsi ilə bağlı dinləmələrdə iştirak ediblər, işçi qrupunun tərkibində olublar.
Onun sözlərinə görə, qanun layihəsi hazırdır və yəqin ki, Milli Məclisin payız sessiyası zamanı plenar iclasa çıxarılacaq və qəbul olunacaq.
Maraqlıdır, yeni qanun layihəsinin nə kimi effektləri olacaq?
Ölkəmizdə psixoloji yardımı təmsil edən rəsmi qaydaların olmadığını deyən psixoloq Azad İsazadə "Şərq”ə bildirib ki, yeni qanun layihəsi imkan verəcək ki, fəaliyyət göstərən müxtəlif psixoloji mərkəzlər, sertifikasiya verən tədris mərkəzləri müvafiq qaydalarla fəaliyyət göstərsin:
"Təəssüf ki, ölkəmizdə psixoloqları idarə edən bir dövlət qurumu yoxdur. Amma həkimlərə, müəllimlərə nəzarət edən qurum mövcuddur. Yəqin ki, yeni qanunda bu məsələlər öz əksini tapacaq. Faktiki olaraq bu gün psixoloji fakültələr ən çox pedaqoji psixoloqlar yetişdirir. Lakin pedaqoji psixologiyadan əlavə hər sahə üzrə psixologiya mövcuddur”.
Yeganə
