Düşmənlə təmas xəttində gərginlik səngimək bilmir. Demək olar ki, hər gecə düşmən tərəf təxribata əl atır, diversiya qruplarını hərəkətə keçirir. Təbii ki, Azərbaycan ordusunun ayıq-sayıqlığı nəticəsində erməni silahlılarına layiqli cavab verilir. Son günlər cəbhə xəttində baş verən hadisələr zamanı düşmən xeyli itkilərə məruz qalıb.
Buna baxmayaraq, ermənilər çirkin oyunlarından əl çəkmək niyyətində deyil. Ekspertlər düşmən təxribatlarını bir neçə məqamla izah edirlər. Bəziləri düşünür ki, ermənilər aprel savaşındakı məğlubiyyətin "qisasını” almaq istəyirlər. Əksəriyyət isə hesab edir ki, cəbhə bölgəsindəki gərginlik Sarkisyan rejiminin daxilə hesablanmış məqsədyönlü siyasəti ilə bağlıdır.
Proseslərlə bağlı "Şərq”ə danışan millət vəkili, Böyük Quruluş Partiyasının sədri Fazil Mustafa deyib ki, erməni təxribatının arxasında kifayət qədər ciddi məqamlar dayanır:
"Azərbaycanın maraqlarına zidd davranan qüvvələrin birgə fəaliyyəti nəticəsində proseslər fərqli istiqamətdə getdi. Dövlətimiz öz gücü hesabına prosesləri irəli apardı. Görünür, bir çoxları real müharibə təhlükəsini hiss edirlər və qarşısını almaq üçün müəyyən addımlar atmağa məcbur olurlar. Ümid edək ki, bu məsələdə Azərbaycanın mövqeyi kifayət qədər güclü olacaq və hansısa şəkildə mövqeyimizə qarşı çıxmaq mümkün olmayacaq. İndiki məqamda münaqişə ilə bağlı yeni situasiya gözlənilmir. Fikrimcə, məsələnin həlli istiqamətində tərəfimizdən daha ciddi addımların atılması olduqca vacibdir”. Deputat bildirib ki, "sülh” çağırışları edən beynəlxalq müşahidəçilərin işi boş-boş danışmaqdır: "Dağlıq Qarabağ cəbhəsində müharibə hər zaman aktualdır. Təmas xəttində gərginlik kifayət qədər çoxdur. Proseslər də artan xətt üzrə gedir. Ancaq nəzərə almaq lazımdır ki, Azərbaycanın mövqeləri daha güclüdür. Hesab edirəm ki, bu periodda daha böyük işlər görməyə imkan tapacağıq”.
F.Mustafa erməni xarici işlər naziri Edvard Nalbandyanın sonuncu bəyanatına da münasibət bildirib:
"Nalbandyan illərdir yalandan deyir ki, guya yaxın zamanlarda hansısa bir dövlət qondarma rejimi tanıyacaq. Bunlar boş söhbətlərdir. Heç bir dövlət erməni nazirin sözünə görə, separatçı rejimi tanımaq kimi mənasız addım atmaz. Erməni ekspertlər tərəfindən adı hallanan Uruqvay dövləti də bu cür riskə getməz. Əgər gedərsə, BMT-nin çox ciddi töhməti altında qalar”. Parlament üzvü Rusiyanın münaqişənin həllində müsbət rol oynayacağına inanmadığını deyib: "Rusiya xarici işlər naziri Sergey Lavrov açıq şəkildə dedi ki, münaqişə müharibə yolu ilə deyil, ancaq sülhlə həll oluna bilər. Bu açıqlama rəsmi Moskvanın mövqeyi sayılmaqla yanaşı, həm də ortaya qoyulmuş təklif kimi bir şeydir. Belə olan halda Elmar Məmmədyarovun və ya Sarkisyanın Moskva səfəri heç bir mahiyyət kəsb etmir. Düşünürəm ki, Rusiya ilə münasibətlər normal səviyyədə saxlanmalıdır. Amma diqqətdən qaçırmamalıyıq ki, Moskva istənilən zaman Ermənistanın lehinə mövqe ortaya qoya bilər. Sadəcə buna hazır olmalıyıq”.
İsmayıl
