"Ölən insanların daxili orqanlarından bəziləri götürülməlidir”. Bu təkliflə Milli Məclisin bu gün keçirilən plenar iclasında deputat Qənirə Paşayeva çıxış edib. Q. Paşayeva deyib ki, beyin ölümü keçirən insanlardan orqan alınması məqsədəuyğundur:
"Azərbaycanda bununla bağlı gözəl bir qanun qəbul edilsə də, tətbiq olunmur. Böyrək, qaraciyər köçürülməsinə ehtiyacı olan xəstələr ölkəmizdə əməliyyat olunur. Amma onlar üçün yalnız sağlam insanlardan orqan götürülür. Xəstənin yaxınlarından biri öz orqanını verir. Bu da o deməkdir ki, sağlam insanların səhhəti yenə təhlükə altına alınır. Hazırda dünyanın bütün inkişaf etmiş ölkələrində ölən insanlardan orqan götürülməsi sistemi inkişaf edib”.
Q. Paşayeva bildirib ki, hazırda Azərbaycanda, ümumiyyətlə, beyin ölümünün konkret təyin mexanizmi də bəlli deyil: "Bu vacib məsələ qısa müddətdə həll olunmalı, qanunun işə salınaraq insanların səhhətinin qorunmasına yönəldilməlidir”.
